Փտածութեան դէմ պայքարող համաշխարհային «Transparency International» դաշինքը հրապարակեց 2024 թուականի փտածութեան համաշխարհային աղիւսակը (CPI), որուն մէջ դասած է 180 երկիրներ՝ իւրաքանչիւրին փտածութեան աստիճանին համաձայն: Ըստ զեկոյցին, 2024-ի աղիւսակը ցոյց կու տայ, թէ փտածութիւնը վտանգաւոր խնդիր է աշխարհի բոլոր շրջաններուն մէջ, սակայն դրական յառաջընթացը զգալի է շատ երկիրներու մէջ: Հանրային ոլորտի փտածութեան աստիճանը բացայայտող այս զեկոյցին մէջ իւրաքանչիւր երկիր իր փտածութեան ցուցանիշը ստացած է զերոյէն հարիւրի միջեւ, ուր աւելի բարձր նիշը կը բացայայտէ նուազ փտածութիւն եւ աւելի թափանցիկ հանրային կեանք:
Արդիւնքներուն համաձայն, աշխարհին մէջ նուազագոյնս փտած երկիրը անցեալ տարուայ նման Դանիան է, որ ստացած է 90/100 ցուցանիշ: Երկրորդ եւ երրորդ դիրքերը գրաւող Ֆինլանտան՝ 88/100 եւ Սինկափուրը՝ 84/100 այս տարուայ աղիւսակին մէջ յառաջդիմած են մէկական դիրք, իսկ Նոր Զելանտա 4-րդն է: Լիւքսամպուրկ 5-րդն է, Նորվեկիա՝ 6-րդ, Զուիցերիա՝ 7-րդ, Շուէտ՝ 8-րդ, Հոլանտա՝ 9-րդ եւ Աւստրալիա, Իրլանտա եւ Իսլանտա՝ միասնաբար 10-րդ: Գանատա 15-րդն է, Ճափոն եւ Բրիտանիա՝ 20-րդ, Ֆրանսա՝ 25, Միացեալ Նահանգներ՝ 28-րդ, իսկ Չինաստան՝ 76: Արաբական աշխարհին մէջ նուազագոյնս փտած է Էմիրութիւնները՝ 23-րդ (68/100): 180 երկիրներու աղիւսակին մէջ, Հայաստանի դիրքը 2023-էն ի վեր չէ փոխուած եւ Խրուաթիոյ հետ 63-րդն է (47/100), իսկ Լիբանան մէկ դիրք նահանջելով այժմ վատագոյն երկիրներու շարքին է՝ 154-րդ (22/100): Նոյն դիրքը կը բաժնեն Ատրպէյճանը, Ռուսիան եւ Հոնտուրասը: Լիբանանի եւ Հայաստանի հարեւաններէն Պաղեստին ընդհանրապէս դասուած չէ, Իսրայէլ 30-րդն է, Կիպրոս՝ 46, Վրաստան՝ 53, Թուրքիա՝ 107, Իրան 151, Սուրիա՝ 177-րդ: Աղիւսակին վերջին երեք դիրքերը կը գրաւեն Վենեզուելա՝ 178-րդ, Սոմալի՝ 179 եւ Հարաւային Սուտան՝ 180-րդ:
