Կազմակերպութեամբ Լիբանանի Ճինիշեան հաստատութեան, Շաթաթ, 8 Փետրուարի առաւօտեան ժամը 10-ին, տեղի ունեցաւ «Երիտասարդութիւնը ընկերութեան մէջ» աշակերտական հանրային բանավէճի ձեռնարկը: Լիբանանի բարեջան առաջնորդ Տ. Շահէ արք. Փանոսեան, վերապատուելի Ռաֆֆի Մսըրլեան եւ հայր Գրիգոր թագադիր ծ. վրդ. Պատիշահի ներկայացուցիչ՝ հայր Սահակ Քէշիշեան կը գլխաւորէին Ազգային առաջնորդարանի «Երջօ Սամուէլեան» սրահ փութացած հայկական վարժարաններու, «Համազգային»ի եւ «Վանայ Ձայն» ռատիոկայանի, «Արարատ» եւ «Ազդակ» օրաթերթերու տնօրէններու, հիւրերու, ուսուցիչներու, ծնողներու եւ աշակերտներու հոծ ներկայութիւնը:
Հանդիսութեան բացման խօսքը կատարեց Ճինիշեան հաստատութեան տնօրէնուհի տիկին Քրիսթին Դանիէլեան, ամփոփ գիծերու մէջ նախ ծանօթացում մը կատարելով Ճինիշեանի մարդասիրական գործունէութեան մասին: Ապա ներկայացուց Գալուստ Կիւլպենկեան եւ Հայաստանի Ճինիշեան հիմնարկներուն համագործակցութեամբ ծնունդ առած «Երիտասարդութիւնը ընկերութեան մէջ» աշակերտական բանավէճ ծրագրին նպատակը, մինչեւ օրս իրագործուած փուլերը եւ հայկական 11 վարժարաններէն մասնակից 30 աշակերտներու հետ կատարուած դասախօսական մարզումներէն ստացուած արդիւնքները: Ազնուափայլ տնօրէնուհին յայտնեց նաեւ, որ յառաջիկայ Մայիս 9-էն մինչեւ 11 Հայաստանի մէջ տեղի պիտի ունենայ տարբեր բնաբանով աշակերտական բանավէճի եզրափակիչ փուլը զանազան գաղթօճախներու հայրենակիցներու միջեւ:
ՄԱՀԱԵՄ Կեդրոնական մարմինի ատենապետ վերապատուելի Ռաֆֆի Մսըրլեանի աղօթքէն ետք, օրուան հանդիսավար պարոն Մանուէլ Թոքմաճեան ներկաներուն ծանօթացուց այսօրուան բանավէճին բնաբանը՝ «Արհեստական բանականութիւնը (AI) ժխտական ազդեցութիւն ունի ուսանողին վրայ», ինչպէս նաեւ բանավիճող երկու խումբերը՝ թեր՝ Սելին Քէօսէեան (ՀԲԸՄ վարժարաններ), Մարիա-Ճեսիքա Հաշոլեան (Մեսրոպեան վրժ.), Մանուէլ Յակոբեան (Ազգ. Եղիշէ Մանուկեան վրժ.) եւ դէմ՝ Յովիկ Չերչեան (Ազգ. Միացեալ վրժ.), Փաթիլ Փափազեան (Սահակեան-Լ. Մկրտիչեան գոլէճ) եւ Մարիլին Պալեան (Շամլեան վրժ.):
Օրդ. Սելլա Սվաքճեանի ջութակի գեղեցիկ նուագէն ետք դատական կազմի անդամներ՝ պրն. Վիգէն Աւագեան, օրդ. Սարին Խաչիկեան եւ տիկ. Լուիզա Պապոյեան թեր եւ դէմ կողմերու միջեւ իւրաքանչիւրին 6 վայրկեանի իրաւունքով ընթացող բանավէճի իրենց գնահատականները արձանագրեցին, ու աւարտէն ետք որպէս եզրափակիչ տպաւորութիւն եւ թելադրանք փոխանցեցին աշակերտներուն:
Մասնակից բանավիճողներէն Մարիա-Ճեսիքա Հաշոլեան չքնաղ ձայնով մեկնաբանեց «Լա պոէմը» երգը:
Աւարտին, լիբանանահայ վարժարաններու աշակերտները միաձուլող սոյն աննախադէպ վիճաբանական ասուլիսին եզրափակիչ խօսքը կատարեց Լիբանանի բարեջան առաջնորդը, անդրադառնալով թէ արհեստական բանականութիւնը կրնայ նպաստել բոլորիս՝ բարելաւելու մեր առօրեայ աշխատանքները, եթէ ճիշդ ձեւով օգտագործուի։ Ան գնահատեց մասնակից աշակերտները, ինչպէս նաեւ Ճինիշեան հաստատութիւնը այս դաստիարակիչ նախաձեռնութեան համար։
