Երկար բացակայութենէ ետք, իսրայէլեան ռազմական օդանաւերը երէկ վերստին յայտնուեցան Պէյրութի վերեւ ու երեկոյեան ժամը 7-ին լիբանանցիները վերստին ցնցուեցան ռազմական օդանաւերու ձայնի պատի խզումէն: Յառաջիկայ Երեքշաբթի, 18 Փետրուարին, կ’աւարտի երկամսեայ պատերազմը դադրեցուցած զինադադարի երկարաձգուած պայմանաժամը, ուստի յառաջիկայ հինգ օրերուն իսրայէլեան ուժերը պէտք է քաշուած ըլլան լիբանանեան հարաւային այն շրջաններէն, ուր տակաւին դիրքաւորուած են պատերազմի աւարտէն ի վեր: Այսուհանդերձ, անցնող օրերուն վերստին կը շրջանառուի զինադադարին ժամկէտը երկարաձգելու նիւթը: Իսրայէլեան բանակը երէկ միակողմանի յայտարարութեամբ մը նշեց, թէ զինադադարը երկարաձգուած է, որովհետեւ տակաւին չէ ամբողջացուցած հարաւային շրջանին մէջ Հըզպալլայի կառոյցներու քանդումը, ուստի լիբանանցի քաղաքացիները պէտք է յետաձգեն իրենց տունդարձը սահմանային առաջնագիծի գիւղեր, ուր տակաւին կ’ընթանան իսրայէլեան զինուորական աշխատանքներ: Իսրայէլեան բանակը այս մասին տեղեկացուց նաեւ զինադադարը դիտարկող միջազգային յանձնախումբին: «Հատաս» լրատուական կայանը իր կարգին հաղորդեց, թէ Լիբանանի ու Իսրայէլի միջեւ համաձայնութիւն գոյացած է երկարաձգելու զինադադարը մինչեւ Ռամատանի աւարտը եւ Ֆիթրի տօնը: Սակայն, Հանրապետութեան նախագահութիւնը յայտարարութեամբ մը ժխտեց զինադադարը երկարաձգելու մասին համաձայնութեան առկայութիւնը եւ շեշտեց, որ Պէյրութ այդ մասին որեւէ տեղեկութիւն չէ ստացած միջազգային կողմերէն, այլ հակառակը, կը պահանջէ իսրայէլեան նահանջ՝ նախքան զինադադարի 18 Փետրուարի պայմանաժամին աւարտը: «Նախագահ Ժոզէֆ Աուն քանի անգամ վերահաստատեց այս առնչութեամբ Լիբանանի անփոփոխ կեցուածքը», նշուեցաւ նախագահութեան յայտարարութեան մէջ: Նախագահը Պաապտայի պալատին մէջ ընդունեց Փորթուկալի արտաքին գործերու նախարարին պատուիրակութիւնը, որուն հետ տեսակցած ատեն եւրոպական երկիրներէն պահանջեց ճնշում բանեցնել Իսրայէլի վրայ, որպէսզի ամբողջացնէ հարաւէն նահանջը, կտրականապէս մերժելով պաղեստինցիներուն տեղահանումը:
