Լիբանանի նորակազմ կառավարութեան առջեւ ցցուած բազում մարտահրաւէրներուն շարքին ամէնէն հրատապն է ապահովական թղթածրարը, որ վերջին օրերու զարգացումներուն լոյսին տակ այլեւս չի սահմանափակուիր երկրի հարաւային շրջաններուն մէջ, այլ հասած է Լիբանան ծայրագոյն հիւսիս-արեւելք՝ Սուրիոյ հետ Հըրմէլ գաւառի սահմանային գօտի, ուր շաբաթավերջին յաւելեալ բախումներ գրանցուեցան մէկ կողմէ սուրիացի զինեալ կազմակերպութիւններու, միւս կողմէ լիբանանեան ցեղախումբերու զինեալներուն միջեւ, պատճառելով մարդկային կորուստ եւ նիւթական ծանր վնաս: Շաբաթ օր, սուրիական կողմէն գործի լծուեցան նաեւ հրետանին եւ հրթիռային համակարգերը, որոնք կրակ տեղացուցին լիբանանեան սահմանամերձ գիւղերուն վրայ: Շուտով, նախագահ Աունի ցուցմունքներով հիւսիսային Պեքաա հասան լիբանանեան բանակի հրետանաւորները եւ հակադարձեցին սուրիացի զինեալներու կրակակէտերուն, համեմատաբար հանդարտեցնելով իրավիճակը:
