Միացեալ Նահանգներու նախագահ Տոնըլտ Թրամփ յայտնեց, թէ յանձնառու կը մնայ Կազան գնելու իր որոշումին, չբացառելով անոր որոշ հատուածներու փոխանցումը միջինարեւելեան այլ երկիրներու՝ զայն վերակառուցելու նպատակով: «Կազան պիտի վերածեմ բարգաւաճող տարածքի, պիտի հոգամ պաղեստինցիներուն եւ երաշխաւորեմ, որ անոնք չսպաննուին», հաւաստիացուց Թրամփ: Ան մտադրութիւն յայտնեց այս հարցով տեսակցիլ սէուտական եւ եգիպտական ղեկավարութեանց հետ, առանց բացառելու կարգ մը պաղեստինցիներու Միացեալ Նահանգներու մէջ հիւրընկալումը: Խօսելով Ուքրանիոյ հարցին մասին, Թրամփ վստահեցուց, որ յառաջընթաց կայ Ռուսիոյ նախագահին հետ խորհրդակցութեանց մէջ, խոստանալով յարմար առիթով տեսակցիլ: «Ինչ հրաշալի կ’ըլլայ, եթէ Գանատա դառնայ Միացալ Նահանգներու 51-րդ նահանգը», իր գայթակղիչ հրաւէրը կրկնեց Թրամփ: Ան քանի մը օր առաջ սպառնաց մաքսային յաւելեալ տուրք սահմանել եւրոպական երկիրներուն նկատմամբ, իսկ Ֆրանսայի արտաքին գործերու նախարարը խոստացաւ հակադարձել ամերիկեան տուրքերուն:
