Մեծի Տանն Կիլիկիոյ Կաթողիկոսութեան Դպրեվանքի անգլերէնի ուսուցչուհի տիկին Լենա Պօղոսեան, 6 Փետրուար 2025-ին, այցելելով «Արարատ»-ի խմբագրատուն՝ տնօրէնութեան նուիրեց իր նախընծան՝ «Echoes Of A Classroom» (Դասարանի Մը Արձագանգները) մակագրեալ օրինակը:
Մեծի Տանն Կիլիկիոյ կաթողիկոսութեան տպարանէն լոյս ընծայուած 107 էջնոց հատորին մէջ ամփոփուած 12 գլուխները վաստկաշատ մանկավարժուհիին դասաւանդման ուղեւորութեան ընթացքին քաղած փորձառութիւններուն ու անձնական մտորումներուն արձագանգն են:
Հատորը նուիրուած է հեղինակին «սիրելի երեխաներուն», «ոգեշնչող ուսանողներուն» եւ բոլոր «նուիրեալ ուսուցիչներուն»:
Մեր կարճ զրոյցին ընթացքին լսեցինք հեղինակին կարծիքը Լիբանանի ներկայ կրթական համակարգի դժուարութիւններուն մասին: Ան պատմեց նաեւ, որ Անարատ Յղութեան Սրբուհի Ագնէս եւ Հայ Աւետարանական Թորոսեան վարժարաններուն մէջ իր աւելի քան 19-ամեայ ուսուցչական ասպարէզի ընթացքին հաւաքած նօթերը, աշակերտներուն նամակները եւ անոնցմէ արձանագրած յուշերը մեծապէս օգտակար հանդիսացած են հատորի ձեւաւորման:
««Echoes Of A Classroom»ը անգլերէնով է, սակայն անոր հոգին հայկական է,- ըսաւ տիկին Լենան ամփոփելով,- «ընթացքի մէջ է երկրորդը՝ հայերէնով երկարաշունչ աշխատանք մը»:
