Ներքին գործերու նախարարի պաշտօնակատար Պասսամ Մաուլաուի յայտնեց, թէ որպէս նախապատրաստութիւն այս տարի կայանալիք քաղաքապետական եւ թաղապետական ընտրութիւններուն, նահանգապետներէն եւ գաւառապետներէն պահանջած է ստուգել ընտրակեդրոններուն քաղաքացիները ընդունելու պատրաստուածութիւնը, բացի հարաւի այն գիւղերէն, ուրկէ տակաւին չեն քաշուած իսրայէլեան ուժերը: Մաուլաուի յանձնարարած է ընտրակեդրոնները օժտել նաեւ ֆիզիքական խնդիրներ ունեցող քաղաքացիները ընդունելու անհրաժեշտ հնարաւորութիւններով: Նշենք, թէ քաղաքապետական ու թաղապետական ընտրութիւնները արդէն երկու անգամ յետաձգուած են ու սկզբունքով պիտի կայանան այս տարի:
