Անցնող երեք օրերուն, ապահովական վիճակը խիստ լարուած էր Սուրիոյ հետ Լիբանանի հիւսիսարեւելեան սահմանային գօտիին վրայ, ուր բախումներ տեղի ունեցան սուրիացի զինեալներու եւ լիբանանեան այդ շրջանի բնակիչ ցեղախումբերուն միջեւ: Երէկ առաւօտեան իրավիճակը դարձեալ վատթարացաւ, երբ սուրիացի զինեալները ռումբեր, հրթիռներ եւ անօդաչու սարքեր արձակեցին լիբանանեան շրջաններուն վրայ, թիրախաւորելով մասնաւորաբար Քուէխ, Քանաֆէզ եւ Սէհլէթ Մայ գիւղերը, մինչ դիպուկահարներ սահմանային կէտերէ կրակ բացին լիբանանեան դիրքերու ուղղութեամբ: Երէկուայ մարտերուն ընթացքին լիբանանեան կողմէն մահացաւ երկու հոգի, վիրաւորուեցան առնուազն տասը ուրիշներ՝ մեծ մասամբ Ժաաֆար գերդաստանէն: Սուրիական կողմէն ալ մահացաւ երկու զինեալ, գերեվարուեցան քանի մը ուրիշներ: Ի տես սահմանային բախումներու լրջութեան, լիբանանեան բանակը երէկ յաւելեալ ուժեր ուղարկեց Պաալպաքի եւ Հըրմէլի սահմանային գօտի՝ հակակշիռի տակ առնելու կացութիւնը: Իսկ երէկ գիշեր, հանրապետութեան նախագահ Ժոզէֆ Աուն հեռաձայնային հաղորդակցութիւն մը ունեցաւ Սուրիոյ անցումային նախագահ Ահմատ Շարաայի հետ՝ քննարկելու սահմանային լարուածութիւնը: Աուն եւ Շարաա համաձայնեցան աշխուժացնել համակարգումը եւ զսպել սահմանային իրավիճակը, կանխելով երկու կողմէն քաղաքացիներու թիրախաւորումը: Նշենք, որ սահմանային Ժոսիէ անցակէտին վրայ երկու կողմերուն միջեւ տեղի ունեցաւ գերիներու փոխանակում՝ Կարմիր խաչին միջնորդութեամբ:
Հիւսիսարեւելեան սահմանային գօտիին կողքին, դրութիւնը տակաւին չէ հանդարտած Լիբանանի հարաւային սահմանամերձ գիւղերուն մէջ, ուր իսրայէլեան ուժերը տակաւին տեղակայուած են լիբանանեան որոշ դիրքերու մէջ ու կը շարունակեն ոտնձգութիւնները: Անցնող ժամերուն, Թէյր Հարֆայի մէջ պայթեցաւ բնակարան մը, իսկ սահմանէն հեռու Զահրանի շրջանի Պէյսարիէ գիւղը թիրախ դարձաւ անօդաչու սարքով յարձակումի:
