Ամերիկացի պատուիրակի տեղակալ Մորկըն Օրթակըս նախագահ Ժոզէֆ Աունին հետ տեսակցելէ ետք յայտնեց, թէ զինուորական պարտութիւն կրած Հըզպալլան որեւէ ձեւով մասնակից չէ Լիբանանի նոր կառավարութեան: «Միացեալ Նահանգներու մէջ բնակող լիբանանցիներուն մօտ նկատեցի աննախադէպ ոգեւորութիւն Լիբանանի վերականգնումին վերաբերեալ: Կը կարծեմ, որ այդ արդիւնք է Հըզպալլայի պարտութեան եւ մենք անոր համար երախտագէտ ենք Իսրայէլին», ըսաւ Օրթակըս: Ան գնահատեց հանրապետութեան նախագահին եւ նշանակեալ վարչապետին յանձնառութիւնը բարեկարգումներուն եւ փտածութեան դէմ պայքարի ուղեգիծին: «Լիբանանցիները պէտք է իմանան, որ մենք յանձնառու կը մնանք մեր բարեկամական յարաբերութիւններուն եւ համագործակցութեան: Այս կը բխի մեր համոզումէն, որ Լիբանանի մէջ կան թափանցիկ եւ անկեղծ աշխատող անձնաւորութիւններ», շեշտեց ամերիկացի պատուիրակին տեղակալը:
Հանրապետութեան նախագահութիւնը շուտով յստակացուց, որ «Միջին Արեւելքի հարցերով ամերիկացի պատուիրակի տեղակալին Պաապտայի պալատէն կատարած յայտարարութիւնը կը ներկայացնէ իր տեսակէտը եւ առնչուած չէ Լիբանանի նախագահութեան դիրքորոշումներուն հետ»:
Բողոքելով Օրթակըսի յայտարարութիւններէն, խումբ մը քաղաքացիներ երէկ կէսօրին անիւներ հրկիզելով ժամանակաւորապէս փակեցին Պէյրութի օդակայանի մայրուղին՝ ինքնաշարժները ուղարկելով երկրորդական ճամբաներու ողղութեամբ: Հըզպալլայի հետեւորդները բողոքի նստացոյց մը կազմակերպեցին նաեւ օդակայանի մուտքին ու շեշտեցին, որ իրենց խնդիրը հանրապետութեան նախագահին հետ չէ, այլ՝ ամերիկացի պատուիրակին: Հըզպալլայի «Հաւատարմութիւն դիմադրութեան» խմբակցութեան նախագահ, երեսփոխան Մոհամմատ Ռաատ ամերիկացի պատուիրակին յայտարարութիւնները համարեց լիբանանեան գերիշխանութեան նկատմամբ ոտնձգութիւն եւ դիւանագիտական բոլոր կարգերու խախտում: Շիիներու մուֆթի շէյխ Ահմատ Քապալան իր կարգին հաւաստիացուց, որ «Հըզպալլա չէ պարտուած ու չի պարտուիր, իսկ առանց Ամալ-Հըզպալլա զոյգին կառավարութեան մը կազմութիւնը երկիրը կը մղէ անորոշութեան»:
Իսկ Ֆրանսայի Արտաքին գործերու նախարարութիւնը, մեկնաբանելով Լիբանանի նոր կառավարութեան մէջ Հըզպալլայի ներկայութիւնը մերժող ամերիկեան դիրքորոշումը, մաղթեց որ նշանակեալ վարչապետը գտնէ յայտնուած բարդոյթները յաղթահարելու միջոցներ:
