Հանրապետութեան նախագահ Միշէլ Աուն երէկ Պաապտայի պալատին մէջ ընդունեց Միջին Արեւելքի հարցերով Միացեալ Նահանգներու յատուկ պատուիրակի տեղակալ Մորկըն Օրթակըսը եւ խօսեցաւ հարաւի վիճակին մասին, շեշտելով մինչեւ 18 Փետրուար երկարաձգուած զինադադարի համաձայնութիւնը ամբողջութեամբ գործադրելու անհրաժեշտութիւնը: «Լիբանանեան բանակը պատրաստ է տեղակայուելու հարաւի բնակավայրերուն մէջ, երբ ամբողջանայ բռնագրաւեալ շրջաններէն իսրայէլեան ուժերուն վերջնական նահանջը՝ հիմնուելով 1701 բանաձեւին վրայ, որպէսզի տուն վերադառնան բնակիչները եւ սկսին վերականգնել իրենց կործանուած բնակավայրերը», պահանջեց նախագահը:
