Որոշակի ձգձգումէ ետք, անցնող 48 ժամերուն վերստին աշխուժացան նոր կառավարութեան կազմութեան միտող բանակցութիւնները, գլխաւորութեամբ հանրապետութեան նախագահին եւ նշանակեալ վարչապետին, անմիջական մասնակցութեամբ խորհրդարանի նախագահ Նեպիհ Պըրրիի, որ մասնաւորաբար հետաքրքրուած էր շիի յարանուանութեան յատկացուած 5-րդ նախարարին ինքնութեամբ: Նշանակեալ վարչապետ Նաուաֆ Սալամ երէկ վերստին այցելեց Պաապտա եւ նախագահ Ժոզէֆ Աունի հետ քննարկեց կառավարութեան կազմութեան թղթածրարն ու նախարարական թեկնածուներուն անունները, ապա մեկնեցաւ առանց մեկնաբանութեան: Նախագահ Ժոզէֆ Աուն յայտնեց, թէ նոր կառավարութեան կազմութիւնը մօտեցած է իր դրական աւարտին, հաւաստիացնելով որ նախարարներուն կազմը պիտի ըլլայ ներդաշնակ եւ գործունեայ, որպէսզի կարենայ իրագործել լիբանանցիներուն իղձերը եւ լուծել երկրին բազում խնդիրները:
Մինչեւ երէկ ուշ գիշեր տակաւին կը շարունակուէին բանակցութիւնները նշեալ նախարարի ինքնութեան շուրջ, միաժամանակ կը հաղորդուէին Սալամի, Պըրրիի եւ Հըզպալլայի միջեւ համաձայնական թեկնածուներու անուններ, մինչ որոշ թեկնածուներ կը ժխտէին նախարար նշանակուելու իրենց հետաքրքրութիւնը:
Կառավարութեան կազմութեան աշխատանքներուն Պըրրիի քուլիսային մասնակցութիւնը յառաջացուց Ազգային ազատ հոսանքի նախագահ Ժըպրան Պասիլի վրդովմունքը: Նախարարներու նշանակումի հոլովոյթին Պըրրիի մասնակցութիւնը համարելով հակասահմանադրական, Պասիլ շեշտեց, որ ստեղծուած վիճակին պատճառը նախարարներու ընտրութեան յստակ չափանիշերու բացակայութիւնն է. «Ուրիշներ գուցէ ընդունին, բայց մենք կը մերժենք մաս կազմել այսպիսի իշխանութեան եւ կը նախընտրենք դառնալ ընդդիմութիւն», ըսաւ Պասիլ:
