– Հաճընի «Տ՛ակ՛էսենք» գերդաստանի շառաւիղ Մանուկ Տագէսեանն ու անոր հայրենակցուհի Վարդուհի Գազանճեան ամոլի երեք զաւակներէն՝ Անդրանիկ, Արա եւ Արի-Մհեր, անդրանիկ որդին ծնած է Նոր Հաճընի մէջ, 6 Փետրուար 1960-ին:
– Նախակրթութիւնը ստացած է Նոր Հաճնոյ Հայ աւետ. Կերթմէնեան վարժարանին մէջ, ապա յաճախած է ՀԲԸՄ Յովակիմեան Մանուկեան մանչերու երկրորդական վարժարանը, որ աւարտելէ ետք, 1978-83 ուսանած է ԵՊՀ Բանասիրական բաժանմունքի գրականագիտական բաժինը:
– Պէյրութ վերադարձէն ետք պաշտօնավարած է «Զարթօնք» օրաթերթին մէջ, իբրեւ մշակութային բաժնի խմբագիր, միաժամանակ դասաւանդելով զանազան վարժարաններու մէջ:
– Հետեւած է քաղաքագիտութեան մագիստրոսաականի Պէյրութի Ամերիկեան համալսարանին մէջ, որ աւարտած է 1989-ին:
– 1990-93 պաշտօնավարած է Կիպրոսի ՀԲԸՄ Մելգոնեան Կրթական հաստատութեան մէջ, երկրորդ տարին իբրեւ աւագ ուսուցիչ, իսկ երրորդ տարին իբրեւ գործադիր տնօրէն:
– Այնուհետեւ Հայկազեան համալսարանի մէջ եղած է Հայկազեան հայագիտական հանդէսի գործադիր քարտուղարը, միաժամանակ դասաւանդելով հոն: 1993-2010՝ վարած է համալսարանի ուսանողական արտադասարանային գործունէութեանց տնօրէնութիւնը:
– 2011-ին պաշտպանած է դոկտորականը քաղաքագիտութեան մէջ՝ «Democracy and integration in multicommunal polities: The Armenians and the Kurds in Lebanon» նիւթով, Ուէյլզի Սուանզի համալսարանին մէջ, ապա անմիջապէս ստանձնած է Հայկազեան համալսարանի նորահաստատ Հայկական սփիւռքի ուսումնասիրութեան կեդրոնի տնօրէնութիւնը, որ կը վարէ մինչեւ այսօր:
– 2018-էն պատասխանատու խմբագիրն է Հայկազեան հայագիտական հանդէսին:
– Անդամ է «Հայագիտական hարցեր» (2014), «Ցեղասպանագիտական hանդէս» (2018), «Բազմավէպ» (2019), «Բանբեր Հայաստանի արխիւների» (2023) պարբերականներու խմբագրակազմերուն:
– Կազմակերպած է աւելի քան մէկ տասնեակ միջազգային գիտաժողովներ, նուիրուած՝ հայկական տարբեր հայօճախներուն, որոնց նիւթերը հրատարակուած են տարբեր հատորներու մէջ:
– Խմբագրած կամ կազմած է զանազան հատորներ եւ մենագրութիւններ, ժողովրդավարացման, մարդկային իրաւանց, ինքնութեան, համարկումի, Սփիւռքի մշակոյթի եւ պահպանման, Միջին Արեւելքի հայօճախներու պատմութեան հարցերու պարունակով:
– Ամուսնացած է զէյթունցի Ալինա Կիւլվանէսեանին հետ, 1988-ին եւ ունի մէկ զաւակ՝ Արեգ-Արտակ:
«Արարատ» ջերմօրէն կը շնորհաւորէ վաստակաշատ բանասէրին ծննդեան 65-ամեակը, մաղթելով գիտական, խմբագրական եւ բանասիրական նորանոր յաղթանակներով զեղուն երկար տարիներու արգասաբեր կեանք մը:
