Հըզպալլայի ընդհանուր քարտուղար Նահիմ Քասէմ յայտնեց, թէ երկամսեայ պատերազմին ընթացքին կուսակցութեան ահաբեկուած ընդհանուր քարտուղարներ սեյիտ Հասան Նասրալլայի եւ սեյիտ Հաշիմ Սաֆիտտինի ժողովրդային հրաժեշտը եւ թաղումը տեղի պիտի ունենան Կիրակի, 23 Փետրուարին՝ Պէյրութի մարզական աւանին մէջ, ապա Նասրալլայի մարմինը պիտի ամփոփուի օդակայանի ճամբուն մերձակայ յատուկ հողաշերտի մը մէջ, մինչ Սաֆիտտինի մարմինը պիտի ամփոփուի իր ծննդավայր Տէյր Քանունի մէջ: Քասէմ իր հեռասփռուած ուղերձին մէջ անդրադարձաւ նաեւ հարաւի վիճակին եւ լիբանանեան զարգացումներուն: Ան դատապարտեց վերջերս Պէյրութի եւ մերձակայ շրջաններուն մէջ տեղի ունեցած մոթորսիքլէթներով ցուցադրութիւնները, Հըզպալլայի հետեւորդներէն պահանջելով զերծ մնալ այլ շրջաններու մէջ նման շարժումներ կազմակերպելէ կամ ուրախ եւ տխուր առիթներով օդը կրակ բանալէ: Ընդհանուր քարտուղարը ողջունեց Կազայի մէջ պաղեստինցի գերիներու ազատ արձակումը եւ զայն համարեց մեծ յաղթանակ մը:
