Երկու շաբաթ մնացած է երկամսեայ պատերազմի դադրեցուցած զինադադարի երկարաձգուած ժամանահատուածի սպառումին, սակայն տակաւին կը շարունակուին իսրայէլեան բռնարարքները հարաւային բռնագրաւեալ գօտիին մէջ: Իսրայէլեան ուժերը երէկ կրակ բացին Հաուլա վերադարձող քաղաքացիներուն ուղղութեամբ, ինչպէս նաեւ բնակարաններ հրկիզեց սահմանային Ատէյսէ գիւղին մէջ: Իսրայէլի պաշտպանութեան նախարար Իսրայէլ Քաց զգուշացուց, որ «եթէ Լիբանանէն անօդաչու սարքերուն արձակումը չդադրի, ապա Հըզպալլա պիտի չմնայ»: Իսկ վարչապետ Պենիամին Նեթանիահու յոխորտաց, որ պատերազմի ընթացքին իր կառավարութեան կայացուցած որոշումները փոխած են Միջին Արեւելքը եւ ամրապնդած են սեփական անվտանգութիւնը:
