Քաղաքական եւ ապահովական փոփոխութիւններու փուլ բոլորող Լիբանան անցնող օրերուն ականատես դարձաւ անվտանգութեան փխրուն վիճակին մասին աղաղակող երեւոյթներու՝ գողութիւն եւ թալանում, կրակոցներ, մահափորձ եւ ոճրագործութիւն: Այս ծիրին մէջ, Մեծի Տանն Կիլիկիոյ Կաթողիկոսութենէն հրապարակուած բօթը ծանրագոյնս ցնցեց լիբանանահայութիւնը՝ մասնաւորապէս, եւ բոլոր լիբանանցիները՝ ընդհանրապէս: Շաբաթ, 1 Փետրուարին, Կաթողիկոսութիւնը գուժեց երիտասարդ միաբաններէն, Պեքաայի շրջանի հոգեւոր տեսուչ Անանիա ծ. վրդ. Գուճանեանի վախճանումը: Արագօրէն տեղական լրատուամիջոցներուն եւ ընկերային հաղորդակցութեանց ցանցերուն վրայ տարածուած տեղեկութիւնները բացայայտեցին, թէ նախորդ օրէն ի վեր հայր սուրբէն տեղեկութիւն չստանալէ ետք, անոր մարմինը գտնուած է Պսալիմ շրջանին մէջ: Միակ հաստատ տեղեկութիւնը այն էր, թէ ան զոհն է անարգ ոճիրի, մինչ ապահովական նախնական վարկածներ տարածուեցան տեղի ունեցած սպանութեան դրդապատճառներուն եւ հաւանական հեղինակներուն առնչութեամբ: Հանրապետութեան նախագահ Ժոզէֆ Աուն եւ վարչապետի պաշտօնակատար Նեժիպ Միքաթի հեռաձայնային հաղորդակցութիւններ ունեցան Մեծի Տանն Կիլիկիոյ Արամ Ա. կաթողիկոսին հետ, խստիւ դատապարտեցին տեղի ունեցածը, ցաւակցեցան Կաթողիկոսութեան եւ վախճանեալ հայր սուրբի ընտանիքին, շեշտելով որ անհրաժեշտ ցուցմունքները տուած են ապահովական մարմիններուն՝ բանալու հետաքննութիւն եւ անյապաղ բացայայտելու ոճրագործութեան ծալքերը, հեղինակները ձերբակալելու եւ խստիւ պատժելու համար:
Նշենք, որ վախճանեալ Հայր սուրբին վերջին օծումի արարողութիւնը տեղի պիտի ունենայ այսօր առաւօտեան ժամը 9:30-ին Այնճարի Սուրբ Պօղոս եկեղեցւոյ մէջ, որմէ ետք անոր մարմինը պիտի փոխադրուի Անթիլիասի մայրավանք, ուր ժամը 2:30-ին պիտի կատարուի Գերեզմանի կարգը եւ հայր սուրբին մարմինը պիտի ամփոփուի Կաթողիկոսարանի «Զարեհեան» միաբանական յուշարձան-դամբարանին մէջ:
Ըստ Կաթողիկոսութեան համացանցային «Cilicia TV» էջին վրայ հրապարակուած կենսագրութեան, վախճանեալ հայր սուրբը ծնած է Պէյրութ, 1 Յուլիս 1982-ին, աւազանի անունով՝ Անդրանիկ: Սարկաւագ ձեռնդրուած է 2002-ին, իսկ կուսակրօն քահանայ՝ 2004-ի 7 Յունիսին, վերակոչուելով Անանիա աբեղայ: Սն վարդապետական գաւազան ստացած է 2010-ին, լանջախաչ կրելու իրաւունք՝ 2012-ին, իակ ծայրագոյն վարդապետութեան իշխանութիւն՝ 2016-ին: Հոգեւոր առաքելութիւններով քանի մը անգամ մեկնած է Իրան՝ նախ Ատրպատականի, ապա Սպահանի թեմերը: Լիբանան վերադառնալով, նշանակուած է Լիբանանի Հայոց Թեմի առաջնորդի օգնական եւ քարոզիչ, իսկ 2020-էն մինչեւ վախճանումը՝ Պեքաայի շրջանի Հոգեւոր տեսուչ:
