Սուրիոյ անցումային շրջանի նախագահ Ահմատ Շարաա յայտնեց, որ մասնագէտներու հետ երկարատեւ խորհրդակցութիւններու լոյսին տակ որոշած է ժամանակաւորապէս ստանձնել երկրին նախագահութիւնը՝ պահպանելու համար քաղաքական հոլովոյթին հեզասահ ընթացքը եւ երկիրը վերականգնելու աշխատանքները: Շեշտելով անցումային փուլին բոլոր սուրիացիներուն մասնակցութեան անհրաժեշտութիւնը, Շարաա խոստացաւ անյապաղ կազմել անցումային շրջանի կառավարութիւնը, ուր կ’արտացոլուի սուրիական հաւաքականութեան բոլոր բաղադրիչները եւ աշխատանք կը տարուի կառուցելու հաստատութիւններու նոր պետութիւն մը՝ մինչեւ արդար եւ թափանցիկ ընտրութիւններու կազմակերպումը եւ նոր իշխանութեան ձեւաւորումը: «Շուտով պիտի կազմեմ նախապատրաստական յանձնախումբ մը, որ պիտի նշանակէ անցումային օրէնսդրական սեղմ խորհուրդին անդամները», բացատրեց Շարաա: Ան երէկ նախագահական պալատին մէջ ընդունեց Քաթարի Թամիմ պըն Համատ Ալ Սանի իշխանին գլխաւորած պատուիրակութիւնը, որուն հետ քննարկեց երկկողմանի յարաբերութիւնները սուրիացիներուն օգնելու եւ Սուրիոյ վերականգնումին աջակցելու միջոցները:
Նոյն ծիրին մէջ, «Ալ-Արապիա» հեռատեսիլի կայանը երէկ հաղորդեց, թէ Սուրիոյ մէջ ձերբակալուած է նախկին իշխանութեան օրերուն հարաւային Տարաա գաւառի քաղաքական անվտանգութեան ծառայութեան նախագահ Աթէֆ Նաժիպը՝ նախկին նախագահ Պաշշար Ասատի մօրաքրոջ որդին: Իսկ ամերիկեան բանակներու կեդրոնական հրամանատարութիւնը յայտարարեց, որ հետախուզական տուեալներու հիման վրայ, Սուրիոյ հիւսիսարեւմտեան հատուածին մէջ թիրախաւորած է Քայիտա կազմակերպութեան հետեւող «Հուրրաս ալ-Տին» կազմակերպութեան անդամներէն մէկը: Սուրիոյ քաղաքացիական անվտանգութիւնը նախապէս յայտարարած էր անծանօթ անօդաչու սարքի մը հարուածով Ըտլիպի հիւսիսային շրջանին մէջ անծանօթ մարդու մը սպանութեան մասին:
