«Ցեղասպանությեան ժխտումը կամ հերքումը ՀՀ-ում քրէական յանցագործութիւն է, քրէական օրէնսգրքով նախատեսուած արարք է»:
Կարէն Դեմիրճեանի անուան մարզահամերգային համալիրին մէջ հրաւիրած ասուլիսի ժամանակ այս մասին յայտնեց ՀՀ վարչապետ Նիկոլ Փաշինեան։
«Ցեղասպանութեան փաստը անքննելի է եւ անժխտելի։ Ընդհանրապէս, զարմանալ կարելի է, թէ ինչպէս ոեւէ մէկին կարելի է մեղադրել Ցեղասպանութիւնը ուրանալու համար, երբ նա երեւոյթի մասին խօսելիս ասում է՝ ցեղասպանութիւն, ոչ թէ ուրիշ բառեր, այլ ասում է՝ ցեղասպանութիւն։ Նման մի դէպք էլ եղել էր կա՛մ 2023, կա՛մ 2024 թուականին, երբ Ապրիլի 24-ի իմ ուղերձից յետոյ աղմուկ բարձրացաւ, այնքան ուժեղ աղմուկ էր, որ ես ինքս բացել ու նորից կարդացել եմ իմ ուղերձը, չեմ վստահել ոչ մէկին, ու դրանից յետոյ ասել եմ՝ ինչո՞ւ չենք արձագանգում, յարգելիներս, շատ յստակ աներկբայ, անքննելի ձեւով արձանագրուած է իրողութիւնը»,- ըսաւ ան։
Փաշինեան անդրադարձաւ նաեւ Յունուար 24-ին զուիցերիահայ համայնքի խումբ մը ներկայացուցիչներուն հետ հանդիպման ընթացքին կատարուած յայտարարութեան։
Ան նկատեց․ «Խօսքը լրիւ ուրիշ բանի մասին է, որ Ցեղասպանութիւնը արդեօք մեզ չպէտք է դրդի, որ մենք մի հատ էլ անդրադառնանք աշխարհը ընկալելու մեր բանաձեւին, կարող է իրողութիւնները դարասկզբին էլ, այսօր էլ ճշգրիտ չենք ընկալում, կարող է չափից աւելի մեծ յոյս ենք դնում արտաքին քաջալերումներին, խրախուսումներին, կարող է լաւ չենք հաշուարկում այդ ազդակների նկատմամբ մեր վերաբերմունքը․ այս հարցը հրատապ է այսօր»։