Ռուսիոյ արտաքին գործերու փոխնախարար Միխայիլ Պոկտանով Դամասկոսի մէջ տեսակցեցաւ Սուրիոյ նոր իշխանութեան ղեկավար Ահմատ Շարաայի հետ՝ քննարկելու երկկողմանի յարաբերութիւնները եւ Սուրիոյ վիճակը: Ըստ «Ռոյթըրզ» լրատու գործակալութեան, Շարաա Մոսկուայի իշխանութիւններէն պահանջած է արտայանձնել Սուրիոյ նախկին նախագահ Պաշշար Ասատը եւ անոր իշխանութեան օրերու օգնականները: Ռուսիոյ Արտաքին գործերու նախարարութիւնը յայտարարեց, թէ Դամասկոսի եւ Մոսկուայի իշխանութիւնները համաձայնած են շարունակել հաղորդակցութիւնները եւ ամրապնդել երկկողմանի յարաբերութիւնները՝ մանաւանդ արտաքին քաղաքականութեան ոլորտին մէջ: Ռուսական կողմը միաժամանակ պատրաստակամութիւն յայտնած է օգնելու Սուրիոյ՝ վերականգնելու երկիրը եւ խորացնելու բարեկամութեան եւ գործընկերութեան վրայ հիմնուած երկկողմանի կապերը: Իսկ Սուրիոյ ելեւմուտքի նախարար Մոհամմատ Ապազիտ տեսակցեցաւ Դամասկոսի մէջ Եւրոմիութիւնը ներկայացնող պատուիրակութեան հետ՝ քննարկելու համագործակցութիւնը, Սուրիոյ մէջ տիրող դրութիւնն ու Դամասկոսի նկատմամբ սահմանուած եւրոպական պատժամիջոցներուն չեղարկումը: Նախապէս, Եւրոմիութեան բանբերը յայտնած էր, թէ կը քննարկուին այն ոլորտները, որոնց պատժամիջոցները կարելի է չեղակել:
