Իսրայէլի վարչապետութեան դիւանը յայտարարեց, թէ Միացեալ Նահանգներու նախագահ Տոնըլտ Թրամփ վարչապետ Պենիամին Նեթանիահուն հրաւիրած է Ուաշինկթըն՝ 4 Փետրուարին գումարելու համար ժողով մը Սպիտակ տան մէջ: Ըստ յայտարարութեան, Նեթանիահու պիտի ըլլայ Թրամփի երկրորդ պաշտօնավարութեան ընթացքին անոր հետ տեսակցող արտերկրացի առաջին ղեկավարը:
Իսկ Իրանի արտաքին գործերու նախարար Ապպաս Արաքժի յայտնեց, որ Միացեալ Նահանգներու նախագահէն ցարդ որեւէ նամակ չեն ստացած հիւլէական բանակցութիւնները շարունակելու առնչութեամբ:
