Հանրապետութեան Նախագահ Ժոզէֆ Աուն ընդունեց Միջազգային դրամատան տարածաշրջանային տնօրէնին գլխաւորած պատուիրակութիւնը, որուն հետ արծարծեց համագորածակցութեան հնարաւորութիւնները: «Լիբանանի մէջ կը մտադրենք իրագործել անհրաժեշտ բարեկարգումներ, ինչպէս յայտարարեցի երդմնակալութեան ուղերձիս մէջ», ըսաւ Աուն, խոստանալով բարեկարգումի նիւթեր մշակել զանազան ոլորտներու մէջ: Ըստ նախագահին, յաջորդ փուլին առաջնահերթութիւններն են պատերազմին կործանուած շրջաններուն վերակառուցումը եւ պետական հաստատութիւններուն աշխատանքին աշխուժացումը: Շնորհակալութիւն յայտնելով Միջազգային դրամատան՝ իր հետեւողական աջակցութեան համար, Աուն շեշտեց, որ Լիբանանի խորհրդարանը շուտով պիտի աշխատի վաւերացնել բարեկարգչական համապատասխան օրինագիծերը: Հիւր պատուիրակութիւնը, միւս կողմէ, պատրաստակամութիւն յայտնեց օգնելու Լիբանանին՝ դիմագրաւելու ընկերատնտեսական ծանր մարտահրաւէրները:
Նոյն ծիրին մէջ, Դրամատուներու միութիւնը իր արտակարգ համագումարին ընթացքին կատարեց կանոնադրութեան փոփոխութիւն մը, որուն հիման վրայ Միութեան նախագահ Սալիմ Սֆէյրը վերընտրեց պաշտօնավարումի երրորդ ժամանակաշրջանի համար, ինչպէս նաեւ վարչութեան անդամներուն թիւը 12-էն բարձրացուց 14-ի: Իր առաջին յայտարարութեան մէջ Սֆէյր առաջարկեց գումարել ելեւմտական երկխօսութիւն՝ իրականացնելու համար բարեփոխումներ եւ երաշխաւորելու աւանդատէրերուն իրաւունքները:
