Նշանակեալ վարչապետ Նաուաֆ Սալամ երէկ վերստին այցելեց Պաապտայի պալատ, ուր նոր կառավարութեան կազմութեան զարգացումները արծարծեց հանրապետութեան նախագահ Ժոզէֆ Աունի հետ: Սալամ ժողովէն ետք լրագրողներուն յայտնեց, թէ գիշեր-ցերեկ կ’աշխատի նոր կառավարութիւնը կազմելու համար, կոչ ուղղելով համբերութեան, որպէսզի կարելի ըլլայ խուսափել տարաձայնութիւններէն: «Ես բոլորին հետ համբերատար աշխատող եմ եւ պիտի դիմագրաւեմ դժուարութիւնները, որպէսզի շուտով ծնունդ առնէ նոր կառավարութիւնը», յայտնեց Սալամ: Ան նախընտրեց, որ ինք ըլլայ լուրերուն աղբիւրը, ոչ թէ ընկերային հաղորդակցութեանց հարթակները կամ լրատուամիջոցները: Ուստի յայտարարեց նախարարի պաշտօն սատանձնելու չափանիշերը. առաջին՝ երեսփոխանի եւ նախարարի պաշտօններու տարանջատումը, երկրորդ՝ ազգային ատակ ուժերու որդեգրումը, երրորդ՝ նախարար չի կրնար նշանակուիլ քաղաքապետական կամ երեսփոխանական ընտրութեան թեկնածու մը, չորրորդ՝ կառավարութեան մէջ կուսակցական ներկայացուցիչ չկայ: Սալամ նշեց, որ կառավարութիւնը պիտի կազմուի 24 նախարարէ եւ պիտի ամբողջանայ հնարաւորինս արագ: Նշենք, որ նմանօրինակ ժողով մը գումարուած էր նաեւ նախանցեալ օր: Իսկ հանրապետութեան նախագահ Ժոզէֆ Աուն կոչ ուղղեց զերծ մնալու քաղաքական մանր տարակարծութիւններէն եւ նեղմտութենէն, յիշեցնելով որ բոլոր նախարարութիւնները կը պատկանին Լիբանանին եւ կը միտին ծառայել անոր ու ժողովուրդին:
Նշենք, որ երէկ յետմիջօրէին խումբ մը քաղաքացիներ հաւաքուեցան Սալամի Քրայթէմ թաղամասի բնակարանին առջեւ՝ մերժելու կառավարութեան կազմութեան մէջ յարանուանական եւ քաղաքական բաժանումներու տրամաբանութիւնը:
