– Գաբրիէլ Մոլոյեան ծնած է 30 Յունուար 1933-ին, Պէյրութ, Լիբանան:
– Մեծի Տանն Կիլիկիոյ Կաթողիկոսութեան Անթիլիասի դպրեվանքը յաճախելէն յետոյ, Լիբանանի «Սէն Ժոզէֆ» համալսարանի հայագիտական դասընթացքներուն հետեւած է:
– Եղած է Դամասկոսի Ս. Թարգմաչաց վարժարանի ուսուցիչ, իսկ հետագային նշանակուած է փոխտնօրէն Պէյրութի Սահակ-Մեսրոպեան վարժարանին եւ ծառայած է այդ պաշտօնին մէջ 25 տարի շարունակ:
– 1954 թուականին Պէյրութի մէջ, իսկ 1977-ին՝ Լոս Անճըլըսի մէջ խումբ մը ընկերներու հետ հիմնած է Նոր Սերունդ մշակութային միութիւնը։ Աւելի քան 30 տարի եղեր է նոյն միութեան վարչութեան անդամ եւ ատենապետ:
– Կլէնտէյլի մէջ կառուցուող Հայ-Ամերիկեան թանգարանի համահայկական տնօրէններու խորհուրդի անդամ է:
– Աշխատած է որպէս լրագրող եւ խմբագիր «Արարատ» օրաթերթի, «Արարատ» գրական ամսագրի եւ «Մասիս» շաբաթաթերթի:
– Ներգաղթելով Միացեալ Նահանգներ, Գաբրիէլ Մոլոյեան 1983-2005 թուականներուն եղած է Փասատինայի Ս. Գրիգոր Լուսաւորիչ եկեղեցւոյ «Ա. եւ Մ. Յովսէփեան» ազգային վաժարանի հիմնադիր անդամներէն մէկը եւ հոգաբարձութեան անդամ:
– 1977 թուականին եղած է Գալիֆորնիոյ Ս. Դ. Հնչակեան կուսակցութեան շրջանի հիմնադիրն ու առաջին ատենապետը:
– 1980 թուականէն մինչեւ օրս Լոս Անճըլըսի մէջ տպագրուող «Մասիս» շաբաթաթերթի խմբագրակազմի անդամ է:
– Նոր Սերունդ մշակութային միութեան հիմնադրման 50-ամեակին իր մատուցած ազգային, տասնամեակներ շարունակ իր համայնքին կատարած մշակութային եւ կրթական ծառայութիւններու համար, 2005 թուականին Մոլոյեանը արժանացեր է Ամենայն Հայոց Կաթողիկոս Գարեգին Բ.-ի կոնդակին եւ «Ներսէս Շնորհալի» շքանշանին:
«Արարատ»-ի երբեմնի խմբագրին 92-ամեակին առիթով թող այս տողերը ընդունուին որպէս ներկայ տնօրէնութեան եւ պաշտօնէութեան շնորհաւորական սրտագին արտայայտութիւն, գալիք տարիները խաղաղ կեանքով ու առողջութեամբ դիմաւորելու մաղթանքներով:
