Եւրոմիութեան երկիրներու դեսպանները Պրիւքսէլի մէջ հաւանութիւն տուած են Հայաստանի մէջ ԵՄ քաղաքացիական առաքելութեան մասին որոշման, որով եւրոպացի դիտորդները պիտի մնան Հայաստանի սահմանամերձ շրջաններուն մէջ եւս երկու տարի ՝ մինչեւ 2027 թուականի Փետրուար 19։
Եւրոմիութիւնը անփոփոխ թողած է առաքելութեան մանտաթը, որ տրուած էր երկու տարի առաջ՝ նպաստել Հայաստանի սահմանամերձ եւ հակամարտութենէն տուժած շրջաններուն մէջ միջադէպերու թիւի նուազման, նուազեցնել այդ շրջաններուն մէջ ապրող բնակչութեան համար վտանգի աստիճանը եւ անով նպաստել գետնի վրայ հայ-ատրպէյճանական յարաբերութիւններու կարգաւորման։
Դիտորդներուն կազմն ու թուաքանակը, ըստ որոշման նախագիծին, պիտի մնայ անփոփոխ՝ 165 միջազգային ու 44 հայաստանցի աշխատող:
Ըստ Հայաստանի մէջ ԵՄ առաքելութեան, այս որոշումը պէտք է յառաջիկային հաստատուի նաեւ ԵՄ անդամ երկիրներու արտաքին գործերու նախարարներու կողմէ, ինչը փաստացի պաշտօնական բնոյթ կը կրէ, քանի որ այդ երկիրներու դեսպանները արտայայտած են իրենց կառավարութիւններուն տեսակէտը՝ կողմ քուէարկելով նախագիծին:
Առաքելութեան դիտարկման գօտին, ըստ պաշտօնական հաղորդագրութեան, կը տարածուի հայ-ատրպէյճանական սահմանի ամբողջ երկայնքով, ներառեալ Նախիջեւանի հատուածը։
«Հաշուի առնելով տարածքին զգալի չափերը՝ առաքելութիւնը իր տրամադրութեան տակ եղած միջոցներով ի վիճակի չէ նկատելու սահմանին երկայնքով տեղի ունեցող որեւէ միջադէպ»,- տեղակայումէն յետոյ յայտնած էր դիտորդական առաքելութիւնը, մանրամասնելով՝ «պարեկները կը ձգտին այցելելու այն վայրեր, ուր տեղի ունեցած են միջադէպեր, այնուհետեւ զեկուցելու այդ մասին Եւրոմիութեան կեդրոնակայան՝ հիմք ընդունելով բաց աղբիւրներէ ու վստահելի ականատեսներէ ստացուած տեղեկութիւնները»։
