ԵՄ անդամակցութեան գործընթաց սկսելու Հայաստանի նախաձեռնութիւնը պիտի չքննարկուի Ուրբաթ օր Ալմաթիի մէջ կայանալիք Եւրասիական միջկառավարական խորհուրդի նիստին։ Այս մասին յայտնած է Ռուսաստանի փոխվարչապետ Ալեքսէյ Օվերչուք։
Ի պատասխան հարցումին՝ պիտի քննարկուի՞ արդեօք ԵՄ-ին համարկուելու Հայաստանի ձգտումը, Օվերչուք ըսած է, որ օրակարգը արդէն հաստատուած է, եւ «այդ հարցերը այստեղ պիտի չբարձրացուին»։
Ան յաւելած է, որ Հայաստան ԵԱՏՄ-ի մէջ գործուն դերակատարում ունի եւ ինքզինք կառուցողական կը պահէ։
«Ինչպէս բազմիցս ըսած եմ, Հայաստանը ԵԱՏՄ-ի մէջ հիմնական օգտնուողն է: Անցեալ տարի առեւտուրը կազմած է 12 միլիառ տոլար, ինչ որ քանի մը անգամ կը գերազանցէ ԵՄ-ի հետ Հայաստանի առեւտուրի ծաւալը: Միեւնոյն ժամանակ առեւտուրը ԵԱՏՄ երկիրներու հետ կ’աճի, ԵՄ-ի հետ՝ կը նուազի, ինչ որ այլ խօսքերէն աւելի լաւ կը բնութագրէ տնտեսութեան իրական վիճակը»,- ըսած է ՌԴ փոխվարչապետը։
Միաժամանակ ռուս փոխվարչապետը կրկնած է, որ Եւրոմիութեան Հայաստանի անդամակցութեան սկիզբը պիտի նշանակէ ԵԱՏՄ-էն անոր դուրս գալու սկիզբ։
«Այստեղ լուծումը ակնյայտ է. Եւրոմիութեան հետ շուկաներու բացումը պիտի նշանակէ Եւրասիական տնտեսական միութեան հետ շուկաներու փակում: Այլապէս պիտի տուժեն Եւրասիական տնտեսական միութեան մեր արտադրողները… Սա ակնյայտ է, ԵՄ-ի հետ ներմուծման մաքսային դրոյքաչափերու զերոյացումը ինքնաբերաբար պիտի նշանակէ վերադարձ մաքսային եւ մաքսային սակագինին ԵԱՏՄ-ի հետ… Ոչ ոք այստեղ պատրանքներ պէտք է ունենայ»,- նշած է Օվերչուք։
Ան վստահ է, որ «ատիկա բացարձակապէս ակնյայտ է ոեւէ մարդու համար, որ թէկուզ քիչ մը ծանօթ է, թէ ինչպէս կառուցուած են այս երկու միրաւորումները»։ Հայկական կողմը, ըստ ՌԴ փոխվարչապետին, միանգամայն յստակ գիտէ, թէ այդ ինչ հետեւանքներ պիտի ունենայ։
