Եւրոպայի խորհուրդի խորհրդարանական վեհաժողովը ընդունած բանաձեւով Ատրպէյճանին կոչ ըրած է ազատ արձակելու Լեռնային Ղարաբաղի նախկին ռազմաքաղաքական պաշտօնեաները եւ միւս հայերը։ Այս մասին նշուած է ԵԽԽՎ-ի տարածած յայտարարութեան մէջ։
Բանաձեւը անդրադարձած է Ատրպէյճանի մէջ ապօրինի եւ շինծու մեղադրանքներով անազատութեան մէջ պահուող Լեռնային Ղարաբաղի նախկին ռազմաքաղաքական ներկայացուցիչներուն եւ այլ անձերու՝ կոչ ընելով Ատրպէյճանին ազատ արձակելու այդ մարդիկը։
«Վեհաժողովը կը շարունակէ հետեւիլ Լեռնային Ղարաբաղի եւ բոլորի կալանաւորուած անձերու եւ ռազմագերիներու հետ կապուած իրավիճակին, որոնք ներկայիս կը գտնուին Ատրպէյճանի մէջ՝ վերահաստատելով անոնց ազատ արձակելու իր կոչը»,- ըսուած է բանաձեւին մէջ։
Վեհաժողովը նաեւ խիստ մտահոգութիւն յայտնած է Ատրպէյճանի մէջ ժողովրդավարութեան, օրէնքի գերակայութեան եւ մարդու իրաւունքներու վատթարացման առնչութեամբ։ «Վեհաժողովը կը շարունակէ լրջօրէն մտահոգուած ըլլալ Ատրպէյճանի մէջ ժողովրդավարութեան վատթարացման, քաղաքական եւ քաղաքացիական հասարակութեան աքթիւիսթներու, լրատուամիջոցներու ներկայացուցիչներու եւ իշխանութեան այլ քննադատներու նկատմամբ բռնութիւններու առնչութեամբ»,- նշուած է բանաձեւին մէջ։
Բանաձեւը Ատրպէյճանի իշխանութիւններուն կոչ կ’ընէ դադրեցնելու հետապնդումները եւ անյապաղ ազատ արձակելու բոլոր անոնք, որոնք կալանաւորուած են քաղաքական դրդապատճառներով։
Այն իշխանութիւններուն կոչ կ’ընէ փոփոխութիւններ կատարելու «կուսակցութիւններու մասին» եւ «լրատուամիջոցներու մասին» օրէնքին մէջ եւ հասարակական կազմակերպութիւններուն վերաբերող համապատասխան օրէնսդրութեան մէջ՝ համաձայն Վենետիկի յանձնաժողովի առաջարկութիւններուն։
Բանաձեւին մէջ նաեւ կը նշուի, որ Ատրպէյճանի մէջ 2024 թուականին կայացած նախագահական ընտրութիւնները չեն համապատասխանած ժողովրդավարական ընտրութիւններու միջազգային չափանիշերուն եւ կայացած են խօսքի, հաւաքներու ազատութեան սահմանափակումներու պայմաններուն մէջ:
