Հանրապետութեան նախագահ Ժոզէֆ Աուն յայտնեց, որ լիբանանեան զանազան խնդիրները լուծելու ուղղութեամբ կ’աշխատի բացայայտ միջոցներով, աւելցնելով որ նախագահը երկրին մէջ գլխաւոր իրաւարարն է: Դրամատուներու միութիւնը ներկայացնող պատուիրակութեան հետ Պաապտայի պալատին մէջ ունեցած տեսակցութեան ընթացքին, Աուն նշեց, որ դրամատնային ոլորտին ճգնաժամը լուծելու համար անհրաժեշտ է պետութեան, դրամատուներուն եւ աւանդատէրերուն ամբողջական համագործակցութիւնը: Դիտել տալով, որ դրամատուները շատ կարեւոր դեր խաղցած են Լիբանանի տնտեսութեան մէջ, նախագահ Աուն ըսաւ. «Իւրաքանչիւր խնդիր ունի իր լուծումը, սակայն այդ միակողմանի չէ, այլ՝ համագործակցական ջանքերով»: Անոր խօսքով, արտերկրէն ներդրումներ եւ աջակցութիւն ապահովելու համար անհրաժեշտ է նախ կազմել նոր կառավարութիւնը, ապա իրականացնել տնտեսական բարեկարգումներ՝ վերականգնելով վստահութիւնը Լիբանանի նկատմամբ:
