Պաշտօնաւարտ վարչապետ Նեժիպ Միքաթի շեշտեց, որ Լիբանան գործադրած է զինադադարի համաձայնութեամբ իրմէ ակնկալուածը, սակայն Իսրայէլ կը ձգձգէ իրեն վերաբերող յօդուածներուն գործադրութիւնը եւ կը շարունակէ խախտել ՄԱԿ-ի 1701 բանաձեւը, որուն վրայ հիմնուած է զինադադարը: Զինադադարի գործադրութեան հետեւող յանձնախումբի նախագահ, ամերիկացի զօրավար Ճէսփըր Ճէֆըրզը եւ Լիբանանի մէջ ամերիկացի դեսպանը իր բնակարանին մէջ ընդունած ատեն, Միքաթի յայտնեց, որ հանրապետութեան եւ խորհրդարանի նախագահներուն հետ որոշուած է Իսրայէլին որեւէ պատճառաբանութիւն չտալ 18 Փետրուարէն անդին Լիբանանի մէջ մնալու համար, աւելցնելով որ, անոր զուգահեռ, միջազգային ընտանիքէն պահանջուած է ճնշում բանեցնել, որպէսզի Իսրայէլ դադրեցնէ իր ամէնօրեայ ոտնձգութիւնները: Պաշտօնաւարտ վարչապետը ընդունեց նաեւ Լիբանանի մէջ Ֆրանսայի դեսպանը, որուն հետ քննարկեց երկկողմանի յարաբերութիւնները եւ հարաւի վիճակը: Միքաթի շնորհակալութիւն յայտնեց Փարիզին՝ լիբանանեան հողերէն իսրայէլեան անյապաղ նահանջը պահանջող աշխատանքին համար: Ան Լիբանանի յանձնառութիւնը յայտնեց զինադադարը երկարաձգելու համաձայնութեան:
