Երկամսեայ պատերազմը դադրեցուցած զինադադարի համաձայնութեան կարեւորագոյն կէտը կը վերաբերի հարաւի բռնագրաւեալ շրջաններէն իսրայէլեան ուժերու նահանջին եւ լիբանանցի քաղաքացիներուն տունդարձին՝ Կիրակի, 26 Յունուարի պայմանաժամով: Այսուհանդերձ, իսրայէլեան բռնագրաւող ուժերուն մեծամասնութիւնը նախանցեալ օր տակաւին կը մնար լիբանանեան հողի վրայ: Ուստի, լիբանանցի քաղաքացիները լիբանանեան բանակին վերահսկողութեամբ նախանցեալ օր սկսան եւ երէկ շարունակեցին մուտք գործել հարաւի իրենց բնակավայրերը, այնտեղ իսրայէլեան ուժերու ներկայութեամբ հանդերձ: Ամէնէն դժուարը եղաւ Մարուահին եւ Պուսթէն գիւղերուն մուտքը, ուստի քաղաքացիները ստիպուեցան բանակին ընկերակցութեամբ հետիոտն հատել գիւղ առաջնորդող ճամբուն վերջին հատուածը:
Հարաւի բնակչութեան մեծամասնութեան տունդարձին իսրայէլացի զինուորները հետեւեցան կրակոցներով եւ յաւելեալ պայթումներ իրականացնելով: Առողջապահութեան նախարարութիւնը երէկ երեկոյեան յայտարարեց, թէ վերջին ժամերուն ինկած է երկու զոհ եւ 17 վիրաւոր՝ ներառեալ երեխայ մը եւ սկաուտ մը: Իսկ նախանցեալ օր, հարաւի տունդարձի ճամբուն վրայ զոհուեցաւ առնուազն 22 հոգի ու վիրաւորուեան քանի մը տասնեակ քաղաքացիներ: Զոհերու շարքին էր լիբանանեան բանակի զինուոր մը: Անցնող երկու օրերուն մեծագոյն պայթումները որոտացին Քֆարքիլայի մէջ, մինչ մերձակայ Տէյր Միմէսի ճամբուն վրայ յայտնաբերուեցաւ հինգ զոհի մարմին: Իսկ Քաֆրայի մէջ, իսրայէլեան ուժեր կրակ բացին փրկարարներու ուղղութեամբ, որոնք կը փորձէին տարհանել երկու զոհի մարմին: Իսրայէլեան բանակը հեռաձայնած է հարաւային Արնունի քաղաքապետին, խորհուրդ տալով արգիլել քաղաքացիներուն վերադարձը՝ մինչեւ զինադադարի նոր պայմանաժամը:
Լարուածութեան սրումի լոյսին տակ, զինադադարի գործադրութեան հետեւող յանձնախումբը միջնորդեց եւ կատարեց մարաթոնային բանակցութիւններ լիբանանեան եւ իսրայէլեան կողմերուն հետ: Շուտով ամերիկեան Սպիտակ տունէն յայտարարուեցաւ, որ զինադադարը երկարաձգուած է մինչեւ 18 Փետրուար եւ իսրայէլացիները պէտք է մինչեւ այդ թուականը դուրս գան Լիբանանէն, եւ լիբանանեան բանակը պէտք է տեղակայուի հարաւի մէջ՝ Հըզպալլայի դէպի Լիթանի գետ նահանջին զուգահեռ: Նոր համաձայնութիւնը նաեւ կը պահանջէ մինչեւ զինադադարի աւարտը ազատ արձակել պատերազմին գերեվարուած լիբանանցիները: Զինադադարի երկարաձգումէն կարճ ժամանակ ետք, «Ֆրանս փրես» լրատու գործակալութիւնը հաղորդեց, թէ երկամսեայ պատերազմին ընթացքին գերի ինկած է Հըզպալլայի եօթը անդամ, որոնց մեծամասնութեան մասին օրին չէր յայտարարուած: Երէկ հաղորդուեցաւ նաեւ, որ իսրայէլացիները սահմանամերձ Ուազանի գիւղէն առեւանգած են լիբանանցի մը:
Իսրայէլեան բանակի բանբեր Աւիխայ Ատրուհի յայտնեց, որ զինուորական ուժերը աստիճանաբար քաշուած են լիբանանեան բռնագրաւեալ գիւղերէն, լիբանանեան բանակին հնարաւորութիւն տալով ամրապնդել իր տեղակայումը սահմանային գօտիին վրայ: Իսկ ամերիկացի նորանշանակ պատուիրակը յայտնեց, որ համաձայնութեան կարելի եղած է յանգիլ բանակցութեամբ՝ յաղթահարելով բարդութիւնները:
