Ուրախութեամբ կը տեղեկանանք, որ Պէյրութի Ամերիկեան համալսարանի դասախօս, քաղաքական գիտութեան եւ հանրային կառավարման վարչութեան նախագահի պաշտօնակատար դոկտ. Ժան Կէօքճեան պաշտօնապէս հրաւիրուած է մաս կազմելու Միջին Արեւելքի ուսումնասիրութիւններու կեդրոնի 2025 թուականի ծրագիրի մշակման խորհուրդին: Յանձին դոկտոր Կէօքճեանի, առաջին անգամն է, որ սոյն պատկառելի խորհուրդը կը համալրուի հայ անդամով մը:
MESA-ի 59-րդ տարեկան ժողովի խորհուրդի առաջնային պարտականութեան ծիրէն ներս կը մտնէ տարուան ընթացքին կարդալ ու գնահատել ներկայացուած առաջարկները՝ անոնցմէ յարմարագոյները ընդգրկելու համար յառաջիկայ 22-25 Նոյեմբեր 2025-ին Ուաշինկթընի մէջ կայանալիք տարեկան ժողովի օրակարգերուն վրայ:
Նշենք նաեւ, որ Դոկտ. Օհաննէս (Ժան) Կէօքճեանին «Խաղաղութեան Ուսումնասիրութիւններու» (Peace Studies) Քաղաքական Գիտութիւններու դոկտորի կոչում շնորհուած է 2005-ին Միացեալ Թագաւորութեան Պրետֆորտ համալսարանէն:
Դոկտորը բազմաթիւ յօդուածներ հրապարակած է արժանահաւատ ամսագրերու մէջ, ինչպիսիք են՝ Middle Eastern Studies, The Middle East Journal, Nationalities Papers, The Armenian Review եւ Journal of the Society for Armenian Studies եւ այլն:
Բացի անկէ, Դոկտ. Ժան Կէօքճեան հրատարակած է երկու գիրք Լեռնային Ղարաբաղի վերաբերեալ. «Ethnicity Nationalism and Conflict in the South Caucasus: Nagorno-Karabakh and the Legacy of Soviet Nationalities Policy (Ashgate 2012)» եւ «Negotiating Armenian-Azerbaijan Peace: Opportunities, Obstacles, Prospects» (Ashgate, 2014): Իսկ «The Russian Military Intervention in Syria» գիրքը լոյս տեսած է 2022-ին, McGill-Queen’s University Press-ի կողմէ:
«Արարատ» յաջողութիւն կը մաղթէ յարգելի դոկտորին իր ստանձնած պատասխանատու յանձնառութեան մէջ:
