Կազայի մէջ զինադադար յայտարարելէ ետք, իսրայէլեան բանակը հաղորդեց Այսրյորդանանի Ժընին շրջանին մէջ լայնածաւալ գործողութիւն մը իրականացնելու մասին: Յորդանանի արտաքին գործերու նախարար Այման Սաֆատի ահազանգեց, որ իրենց հարեւան Այսրյորդանանի մէջ տիրող վիճակը ահաւոր է ու կրնայ ցնցել ամբողջ տարածաշրջանին անվտանգութիւնը: «Մենք կը փորձենք կանխել Այսրյորդանանի իրավիճակին պայթումը եւ պահպանել Կազայի զինադադարը, որուն համար անհրաժեշտ է մարդասիրական մեծածաւալ օգնութիւն տրամադրել պաղեստինցի քաղաքացիներուն», բացատրեց Սաֆատի: Դիտել տալով, որ Սուրիոյ նոր իշխանութիւնները կը յայտարարեն ժողուրդին բոլոր խաւերը եւ յարանուանութիւնները պահպանելու մասին, յորդանանցի նախարարը կարեւորեց Սուրիոյ մէջ ահաբեկչութեան տապալումը եւ տեղահանուած սուրիացիներուն անյապաղ տունդարձը:
Այլ գիծի վրայ, իսրայէլեան շտապ օգնութեան ծառայութիւնը յայտարարեց, թէ չորս մարդ վիրաւորուած է Թել Աւիւի մէջ տեղի ունեցած դաշունահարումի գործողութեան մը ընթացքին: Աւելի ուշ ի յայտ եկաւ, որ յարձակողը մարոքեան արմատներով ամերիկացի մըն է, որուն օգնած է հետապնդումի ենթակայ երկրորդ անձ մը:
