Սուրիոյ մէջ ՄԱԿ-ի պատուիրակ Կիր Փետըրսըն անընդունելի համարեց Սուրիոյ հարաւային շրջանին նկատմամբ իսրայէլեան ոտնձգութիւնները, պահանջելով անյապաղ դադրեցնել զանոնք: Պատուիրակը շեշտեց նաեւ Սուրիոյ դէմ սահմանուած պատժամիջոցները շուտով չեղարկելու կարեւորութիւնը: «Ապահովութեան խորհուրդին առջեւ յայտարարեցի, որ պէտք է լաւապէս նախապատրաստել Սուրիոյ ազգային երկխօսութեան համագումարը», կոչ ուղղեց Փետըրսըն՝ աւելցնելով, որ Սուրիոյ հիւսիսարեւելեան շրջանին դրութիւնը կրնայ մարտահրաւէր մը դառնալ ապագային, հետեւաբար պէտք է օգնութիւն տրամադրել: Ներքին կայունութիւնը պահպանելու համար կարեւորելով միացեալ բանակի մը կազմութիւնը, Փետըրսըն պահանջեց նաեւ երաշխաւորել Սուրիոյ բաղադրիչ բոլոր տարրերուն պաշտպանութիւնը եւ զանոնք մասնակից դարձնել երկրի տնօրինումին: Ան այս առումով ողջունեց նոր իշխանութիւններուն յայտարարութիւնները:
