Կիրակի օր կը սպառի երկամսեայ պատերազմը դադրեցուցած զինադադարի համաձայնութեան 60 օրերը եւ տակաւին իսրայէլեան ուժերը չեն քաշուած լիբանանեան բռնագրաւեալ շրջաններէն: Այս առումով, ՄԱԿ-ի ընդհանուր քարտուղար Անթոնիօ Կութերեշ յայտնեց, որ Լիբանանի դրութեան մասի լաւատես է, սակայն զգուշացուց, թէ որեւէ երաշխիք չկայ զինադադարի շարունակութեան առնչութեամբ: Ըստ Կութերեշի, Միջին Արեւելքի կայունութեան վերաբերեալ կայ յոյսի նշոյլ մը՝ Կազայի մէջ զինադադարի յայտարարութեան լոյսին տակ:
Նշենք, որ հարաւաին շարք մը շրջաններու մէջ կը շարունակուին իսրայէլեան գործողութիւնները: Ըստ Լիբանանի ազգային լրատու գործակալութեան, իսրայէլացի զինուորները երէկ ութ բնակարան պայթեցուցած են Թայպէ գիւղին մէջ, իսկ Սալուքի հովիտի մզկիթին մօտ երէկ յայտնաբերուած է օր մը առաջ իսրայէլեան կրակոցներով սպաննուած քաղաքացիի մը դին: Ան կը փորձէր Մաժտալ Սըլմէն հասնիլ Թալուսէ գիւղի բնակարանը, երթ ենթարկուեցաւ հրաձգութեան:
Հըզպալլայի Քաղաքական խորհուրդի անդամ Ղալէպ Ապու Զէյնապ յիշեցուց, որ Իսրայէլ պէտք է լիբանանեան բռնագրաւեալ հողերէն քաշուած ըլլայ մինչեւ Կիրակի օր, «այլապէս Երկուշաբթի իրավիճակը տարբեր պիտի ըլլայ», զգուշացուց Ապու Զէյնապ:
