Հանրապետութեան նախագահ Ժոզէֆ Աուն կոչ ուղղեց զերծ մնալու մանր հարցերէն, որպէսզի անյապաղ կազմուի կառավարութիւնը եւ սկսի վերականգնումի աշխատանքը: Ըստ Աունի, Նախարարաց խորհուրդը արագօրէն կազմելու նպատակներէն մէկը պատերազմին կործանուած շրջաններուն արագ վերակառուցումն է: Սահմանադրական խորհուրդէն պատուիրակութիւն մը ընդունած ատեն Աուն շեշտեց սահմանադրութիւնը պահպանելու եւ յարգելու կարեւորութիւնը: «Առանց արդարադատութեան, մեր կեանքին կը գերիշխէ անտառի կարգը», ահազանգեց Աուն, կոչ ուղղելով յանձնառու մնալու դատական համակարգի անկախութեան, որպէսզի դատաւորները նկատի առնեն հանրային շահը, ոչ թէ անհատականը:
