Առանց մեծ աղմուկի եւ յաճախակի յայտարարութիւններու, նշանակեալ վարչապետ Նաուաֆ Սալամ կը շարունակէ նոր կառավարութեան կազմութիւնը: Պաապտայի նախագահական պալատը յայտարարեց, թէ Սալամ այցելած է նախագահ Ժոզէֆ Աունին՝ ներկայացնելու կառավարութեան կազմութեան մթնոլորտը եւ քաղաքական ուժերուն հետ շարունակուող խորհրդակցութիւնները՝ պարզելով նաեւ կառավարութեան կառուցուածքին վերաբերեալ իր տեսլականն ու առաջարկները: Աունին հետ տեսակցելէ ետք Սալամ լրագրողներուն յայտնեց, թէ «կառավարութեան կազմութիւնը կ’ընթանայ հաստատ քայլերով եւ նախագահին հետ աշխատանք կը տանինք, որ ուշացում չըլլայ, միաժամանակ հաստատելով նոյն սկզբունքները, որ բացայայտեցի առաջին ուղերձիս մէջ»: Նշելով, որ իր աշխատելաձեւը գուցէ նոր է, Սալամ շեշտեց, թէ անհրաժեշտ է սորվիլ սահմանադրութիւնը ամբողջութեամբ յարգել: Ան նաեւ յիշեցուց, որ Ելեւմուտքի նախարարութիւնը մէկ յարանուանութեան մենաշնորհը չէ:
Ամալ շարժումի «Բարգաւաճում եւ ազատագրութիւն» խորհրդարանական խմբակցութեան անդամ, երեսփոխան Քասէմ Հաշէմ դիտել տուաւ, որ «նշանակեալ վարչապետը ունի կառավարութեան կազմութեան յատուկ տեսլական մը, սակայն կայ որոշ իրականութիւն մը, որ ան պէտք է նկատի առնէ նախարարները ընտրելու ատեն»: Անոր համաձայն, Ելեւմուտքի նախարարութեան հարցով Սալամին հետ իրենց համաձայնութիւնը սկիզբէն յստակ էր: «Կառավարութեան կազմութիւնը կրնայ քանի մը օրէն իրականանալ եթէ լուծուին որոշ հարցեր, որոնք մեր մօտ չեն, այլ՝ միւս կողմին», կարծիք յայտնեց Հաշէմ եւ վստահեցուց, որ Ամալին եւ Հըզպալլային ստանալիք հինգ նախարարութիւնները արդէն յստակացած են, ժխտելով հակառակը պնդող բոլոր լուրերը:
Լիբանանեան ուժեր կուսակցութիւնը միւս կողմէ, սակայն, նկատել տուաւ, թէ Ամալ-Հըզպալլա զոյգին կողմէ նախարարական որոշ անուններ եւ կառավարական որոշ քաղաքականութիւն պարտադրելու փորձը կ’ուշացնէ նոր կառավարութեան կազմութիւնը: Իսկ Ազգային ազատ հոսանքի Քաղաքական խորհուրդը յայտարարեց, թէ հնարաւոր բոլոր դիւրութիւնները ներկայացուցած է նշանակեալ վարչապետին, մաղթելով արդար չափանիշեր ունեցող եւ իւրաքանչիւր ուժի ժողովրդային ներկայացուցչութիւնը նկատի առնող կառավարութեան մը կազմութիւնը: Հոսանքին ղեկավարութիւնը մաղթեց որ կամուի բարեկարգող կառավարութիւն մը:
