Երկրորդ անգամ ըլլալով, Տոնըլտ Թրամփ երէկ մուտք գործեց Սպիտակ տուն, որպէս Միացեալ Նահանգներու նոր նախագահ:
Ամերիկեան նոր վարչակազմի պատասխանատուներէն մէկը յայտնեց, թէ նորընտիր նախագահին առաջին գործերէն մէկը պիտի ըլլայ երկրին մէջ ուժանիւթային արտակարգ դրութեան յայտարարութիւնը, որպէսզի կարելի ըլլայ թափ տալ ամերիկեան ուժանիւթային վստահելի եւ յարմար սակագիներ առաջարկող ոլորտի մը: Նոր վարչակազմը յայտարարեց նաեւ, որ Թրամփ կը մտադրէ չեղարկել սեռերու բազմազանութեան դրութիւնը ու վերստին որոշել, թէ կայ միայն երկու սեռ՝ առական եւ իգական: «Ամերիկացիներուն դրամը պիտի չգործածուի սեռ փոխելու գործողութիւններ կատարելու համար», ըսաւ վարչակազմի պատասխանատուներէն մէկը: Ան նշեց նաեւ, որ Թրամփ կը մտադրէ չեղարկել նաեւ ամերիկեան հողին վրայ ծնածներուն ամերիկեան քաղաքացիութիւն շնորհելու օրէնքը:
Լիբանանի Հանրապետութեան նախագահ Ժոզէֆ Աուն շնորհաւորական հեռագիր յղեց Թրամփին՝ մաղթելով յաջող առաջնորդութիւն դէպի յաւելեալ բարգաւաճում եւ զարգացում: Աուն նաեւ վստահութիւն յայտնեց, որ Թրամփի նախագահութեան օրերուն աւելի պիտի խորանան Պէյրութ-Ուաշինկթըն յարաբերութիւնները:
Թրամփի նախագահութեան հարցով մտահոգութիւն յայտնեց Ֆրանսսայի վարչապետը: Ան ահազանգեց, որ Եւրոպան կրնայ փլուզուիլ եւ կործանուիլ, եթէ անյապաղ քայլերու չդիմէ եւ չպայքարի ամերիկացի նոր նախագահին մենատիրական ձգտումներուն դէմ: Իսկ Հռոմի Ֆրանչիսկոս պապը ահազանգեց, որ գաղթականները ամերիկեան հողերէն վտարելու Թրամփի մտադրութիւնը պիտի ունենայ աղէտալի հետեւանքներ:
