Մեծի Տանն Կիլիկիոյ Արամ Ա. կաթողիկոսին գլխաւորած միաբան հայրերու պատուիրակութիւն մը երէկ այցելեց Պաապտայի նախագահական պալատ, ուր տեսակցեցաւ հանրապետութեան նախագահ Ժոզէֆ Աունի հետ եւ Լիբանանի Հայ առաքելական համայնքին անունով ջերմ շնորհաւորութիւն յայտնեց անոր: Դիտել տալով, որ նախագահին ընտրութեամբ նոր էջ մը կը բացուի Լիբանանի կեանքին մէջ, Վեհափառ Հայրապետը նշեց, որ ընտրութենէն ետք Աունին արտասանած ուղերձը յստակօրէն կը պարզէ անոր տեսլականը եւ յանձնառութիւնը Լիբանանի նկատմամբ՝ յոյս ներշնչելով ժողովուրդին:
Արամ Ա. կաթողիկոս ըսաւ, թէ «Լիբանանը դիմագրաւող ներկայ տագնապներուն դիմաց նախագահի գործունէութիւնը հարկ է դառնայ Լիբանանի փրկութեան ուղղուած առաքելութիւն», լիբանանահայութեան պատրաստակամութիւնը յայտնելով մասնակից դառնալու այդ ուղեգիծին: Ան նախագահին ներկայացուց նաեւ Կաթողիկոսութեան ներքին եւ թեմական կառոյցները: Նախագահ Աուն շնորհակալութիւն յայտնեց Վեհափառ Հայրապետին ու լիբանանահայ համայնքին եւ կարեւորեց հայութեան մասնակցութիւնը թէ՛ նոր կառավարութեան, թէ՛ Լիբանանը վերականգնելու աշխատանքներուն, ընդգծելով միասնականութեան հրամայականը՝ որպէզի Լիբանան առաջնորդուի դէպի բարգաւաճում: Աւարտին, Արամ Ա. կաթողիկոս հանրապետութեան նախագահին նուիրեց Բարձր Բերդի Աւետարանին կրկնօրինակը:
