Լիբանանի Կեդրոնական դրամատան կառավարիչի պաշտօնակատար Ուասիմ Մանսուրի յայտնեց, որ իր ղեկավարած հաստատութեան մէջ չկայ փտածութիւն: Ան դիտել տուաւ, թէ պաշտօնը ստանձնելէն ետք աշխատած էր վերականգնել մարդոց վստահութիւնը եւ բացայայտել իրականութիւնը, ժխտելով դրամատան վիճակին մասին տարածուած տարաձայնութիւնները: «Շնորհիւ մեր որդեգրած քաղաքականութեան, մաքսային ծառայութիւններու բարելաւումին եւ պետական ելեւմուտքի կազմակերպումին, 50 տարիէ ի վեր առաջին անգամ ըլլալով ունինք պիւտճէի 800 միլիոն տոլարի մնացորդ», ըսաւ Մանսուրի: «Չեղարկեցի Սայրաֆա հարթակը եւ դադրեցուցի շուկայէն տոլարի գնումը, առաջարկելով լիրայի վաճառք, այդպիսով կայուն պահեցի տոլարին փոխարժէքը», բացատրեց կառավարիչի պաշտօնատարը, ժխտելով իրեն վերագրուած խօսքերը, թէ աւանդատէրերը պէտք է մոռնան իրենց աւանդներուն մասին:
Իսկ Դրամատուներու միութեան ընդհանուր քարտուղարը յայտնեց, որ դրամատուները պատրաստ են Կեդրոնական դրամատան հետ աշխատելու՝ արդար լուծումներ գտնելու աւանդներու հարցին առնչութեամբ:
