Հինգշաբթի կէսօրին, Ս.Դ.Հ.Կ. Լիբանանի շրջանի Վարիչ մարմինի ատենապետ ընկ. Վանիկ Տագէսեան եւ մամլոյ ու մարզականի դիւանապետ ընկ. Լութֆիկ Կոտալազեան, ընկերակցութեամբ «Արարատ»-ի տնօրէն ընկ. Նազօ Ճէրէճեանի փափկավարական այցելութիւն մը տուին Հայ Կաթողիկէ գերերջանիկ եւ ամենապատիւ Հոգեւոր Տիրոջ, պատրիարքարանին մէջ: Այցելութեան առիթը «Արարատ»-ի նոր տնօրէնին ծանօթացումն էր պատրիարք Հօր:
Նախ ցաւակցութիւն յայտնուեցաւ նորոգ հանգուցեալ հասարակական գործիչ Սարգիս Նաճարեանի կորուստին առթիւ: Ս. Նաճարեան «Արարատ»-ի երկարամեայ խմբագիր ու լրագրող ըլլալու կողքին, տարիներու երկայնքին ծառայած է Հայ Կաթողիկէ եկեղեցւոյ՝ ըլլալով համայնքին կարկառուն դէմքերէն եւ համայնքէն ներս վարած պատասխանատու պաշտօններ: Ապա՝ ընդունելութեան համար շնորհակալական խօսքերէ ետք, տեղի ունեցաւ «Արարատ»-ի նոր տնօրէնին ծանօթացումը: Պատրիարքը ողջունեց ընկերներուն այս պաշտօնական այցելութիւնը: Իրենց հերթին, ընկերները ողջունեցին երջանկայիշատակ ծիրանաւոր Գրիգոր-Պետրոս ԺԵ. Աղաճանեան պատրիարքին անշնչացած մարմինը Պէյրութ տեղափոխման պատմական քայլը, ինչպէս նաեւ Պէյրութի կեդրոնական փողոցներէն մին Աղաճանեան անուանուելուն համար Ռաֆայէլ ԻԱ. կաթողիկոս-պատրիարքին թափած ջանքերը: Անդրադարձ եղաւ Լիբանանի մէջ ստեղծուած նոր իրավիճակին շուրջ լաւատեսական մթնոլորտին եւ շեշտուեցաւ Լիբանանի վերաշինութեան աշխատանքին բոլորանուէր նուիրումին կարեւորութիւնը բոլորին կողմէ եւ յատկապէս հայութեան մասնակցութեան անհրաժեշտութիւնը: Սիրալիր զրոյցին նիւթ եղաւ Սուրիոյ եւ սուրիահայութեան նոր իրավիճակը, որուն ընթացքին կարեւոր նկատուեցաւ խոհեմութեան հրամայականը եւ դէպքերուն ու Սուրիոյ նոր վարչակարգին հետ հանդարտօրէն յարաբերելու սթափութիւնը: Լիբանանի ներքին կեանքին առումով, կարեւորութեամբ հաստատուեցաւ միասնականութիւնը ամրապնդելու անհրաժեշտութիւնը եւ քաղաքական կեանքին բոլոր տարրերուն մասնակցութեան օգտակարութիւնը:
Երկու այցելութիւններուն ընթացքին կը տիրէր փոխադարձ յարգանքի եւ շինիչ ու շահեկան գործակցութեան դրական մթնոլորտ մը:
