Հինգշաբթի առաւօտեան, Ս.Դ.Հ.Կ. Լիբանանի շրջանի Վարիչ մարմինի ատենապետ ընկ. Վանիկ Տագէսեան եւ մամլոյ ու մարզականի դիւանապետ ընկ. Լութֆիկ Կոտալազեան, ընկերակցութեամբ «Արարատ»-ի տնօրէն ընկ. Նազօ Ճէրէճեանի, պաշտօնական այցելութիւն մը տուին Արամ Ա. վեհափառին, Անթիլիասի մայրավանքին մէջ: Այցելութեան առիթը «Արարատ»-ի նոր տնօրէնին ծանօթացումն էր Վեհափառ Հօր՝ զուգահեռաբար արծարծելու գաղութային եւ լիբանանեան հրատապ հարցեր:
Ընկերներուն շնորհակալական խօսքերէն ետք այս ընդունելութեան համար, անոնք նշեցին թէ ընկ. Ն. Ճէրէճեան նախապէս եղած է Հ.Կ.Բ.Մ.-ի Սահակեան-Լեւոն Մկրտիչեան գոլէճի տնօրէն, ինչպէս նաեւ տնօրէն Ազգ. Ռուբինեան վարժարանի: Անոնք աւելցուցին, թէ սերտ գործակցութիւն առկայ է Լիբանանի հնչակեան ղեկավարութեան եւ անոր օրկանին միջեւ: Տարաբնոյթ հարցերու շարքին շեշտուեցաւ մարդուժի կարեւորութիւնը, անդրադարձ եղաւ հայ մամուլի մերօրեայ դժուարութիւններուն, ընդգծուեցաւ Վեհափառին հռչակած աւանդութիւններու կենսագործման անհրաժեշտութիւնը եւ այլն, ապա, Լիբանանի նոր նախագահի՝ Ժոզէֆ Աունի եւ նոր վարչապետի՝ Նաուաֆ Սալամի ընտրութիւնները լաւատեսական մթնոլորտ ստեղծած են եւ անշուշտ պէտք է ծառայեն ընդհանուրի շահերուն: Նշուեցաւ թէ համաձայնաբար գործելով եւ միասնական ջանքերով կարելի է հասնիլ դրական եւ շօշափելի արդիւնքներու: Ընկերները նշեցին թէ յաջողութեան կարեւոր գրաւականը բոլորին մասնակցութիւնն է քաղաքական աշխատանքներուն՝ հեռու նեղ-հատուածական շահերէ: Անդրադարձ եղաւ նաեւ աշխարհաքաղաքական եւ շրջանային այն փոփոխութեանց՝ որոնք պատահեցան վերջերս եւ շեշտուեցաւ որ անհրաժեշտ է խուսափիլ ամէն տեսակի ծայրայեղութիւններէ, որոնք վնասակար եւ կործանարար են բոլորին համար:
