Պաքուի Զինուորական դատարանին մէջ մէջ երէկ սկսաւ աւելի քան մէկ տարիէ կալանաւորուած 23 գերիներէն 15-ին դատավարութիւնը՝ դատաւոր Զէյնալ Աղաեւի նախագահութեամբ: Դատավարութեան ենթարկուող Արցախի նախկին պաշտօնատարները կ’ամբաստանուին ռազմական յանցագործութիւններու, պատերազմ ծրագրելու եւ վարելու, ցեղասպանութեան, ստրկատիրութեան, բռնի տեղահանումի, խոշտանգումներու եւ միջազգային օրէնքի խախտումի եւ այլ յանցանքներով: Յարուցուած է քրէական գործ՝ «Հայաստանի Հանրապետութեան եւ անոր զինուած ուժերուն կողմէ Ատրպէյճանի Հանրապետութեան դէմ իրականացուած ապօրինի գործողութիւններուն, ինչպէս նաեւ Հայաստանի անմիջական մասնակցութեամբ Ատրպէյճանի բռնագրաւեալ տարածքներուն մէջ Լեռնային Ղարաբաղի Հանրապետութեան ապօրինի զինուած կազմաւորումներ կազմելու» յատկանիշերով: 15 հայ մեղադրեալներն են Արցախի Հանրապետութեան նախկին նախագահներ Արկադի Ղուկասեանը, Արայիկ Յարութիւնեանը եւ Բակօ Սահակեանը, Ազգային ժողովի նախկին նախագահ Դաւիթ Իշխանեանը, արտաքին գործերու նախկին նախարար Դաւիթ Պապայեանը, պաշտպանութեան նախկին նախարար Լեւոն Մնացականեանը եւ փոխնախարար Դաւիթ Մանուկեանը, ինչպէս նաեւ Գարիկ Մարտիրոսեանը, Մելիքսէթ Փաշայեանը, Դաւիթ Ալլահվերտեանը, Գուրգէն Ստեփանեանը, Լեւոն Պալայեանը, Մատաթ Պապայեանը, Վասիլի Բեգլարեանն ու Էրիք Ղազարեանը:
