Քանի մը օր առաջ նոր կառավարութեան կազմութեան վերաբերող խորհրդակցութիւնները պոյքոթի ենթարկած խորհրդարանի նախագահ Նեպիհ Պըրրի, երէկ, Այն Թինէի մէջ ընդունեց նշանակեալ վարչապետ Նաուաֆ Սալամը, որուն հետ քննարկեց նոր կառավարութեան կազմութեան թղթածրարը: Պըրրի ապա լրագրողներուն յայտնեց, որ Սալամի հետ տեսակցութիւնը խոստումնալից էր, իսկ Սալամ յայտնեց, որ բոլորը կը կարդան նոյն գիրքէն՝ Թայէֆով բարեփոխուած սահմանադրութենէն, հաւաստիացնելով, թէ «ոեւէ մէկը պիտի չխոչընդոտէ նոր կառավարութեան կազմութիւնը»: Սալամ նշեց, որ իր հետ տեսակցած բոլոր խմբակցութիւններն ու երեսփոխանները արտայայտած են նոյն մտադրութիւնը՝ երկիրը փրկել ու արագօրէն վերականգնել, խոստանալով այդ ուղղութեամբ աշխատիլ 24 ժամ շարունակ:
