Լիբանանի Հանրապետութեան նոր նախագահի ընտրութենէն եւ վարչապետի նշանակումէն օրեր անց, երէկ շնորհաւորական եւ զօրակցական այցելութեամբ Լիբանան ժամանեց Ֆրանսայի նախագահ Էմանուէլ Մաքրոն եւ Պաապտայի պալատին մէջ տեսակցեցաւ նախագահ Ժոզէֆ Աունի հետ: Վերջինս շեշտեց հարաւի մէջ զինադադարի որոշումը ամրապնդելու եւ լիբանանեան բռնագրաւեալ հողերէն իսրայէլեան ուժերու անյապաղ նահանջին կարեւորութիւնը: Աուն մաղթեց, որ իր պաշտօնակիցը համայն աշխարհին ապացուցէ, որ վերականգնուած է պետութեան նկատմամբ լիբանանցիներուն վստահութիւնը, ուստի պէտք է նաեւ վերականգնուի Լիբանանի նկատմամբ աշխարհին վստահութիւնը: Իսկ Մաքրոն Աունին ըսաւ. «Դուք յոյս մըն էք Լիբանանի համար եւ կը ներկայացնէք երկիրը վերականգնելու հնարաւորութիւն: Մենք պիտի աջակցինք գերիշխանութիւն վայելող Լիբանանի ուղղուած ձեր ծրագրերուն»: Մաքրոն խոստացաւ օգնել բանակին, որ շարունակէ իր տեղակայումը հարաւի մէջ եւ պահպանէ Լիբանանի գերիշխանութիւնը, աւելցնելով որ շուտով պիտի գումարուի Լիբանանի վերականգնումին նպաստող միջազգային համաժողով մը: Ֆրանսայի նախագահին համաձայն, Լիբանանի մէջ այժմ անհաւատալի յոյս կայ քաղաքական նոր իրավիճակի հասնելու առնչութեամբ:
Մաքրոն Պաապտայի մէջ զրուցեց նաեւ խորհրդարանի նախագահ Նեպիհ Պըրրիի հետ եւ արծարծեց նոր կառավարութեան կազմութեան վերաբերեալ անոր կեցուածքը: Պըրրի Ֆրանսայի նախագահին փոխանցեց իր լաւատեսութիւնը գալիք օրերուն եւ կառավարութեան կազմութեան առնչութեամբ: Իսկ պաշտօնաւարտ վարչապետ Նեժիպ Միքաթի Մաքրոնին հետ տեսակցած ատեն յայտնեց, թէ Լիբանանին փոխանցուած խոստումներուն համաձայն, իսրայէլեան խախտումները պիտի դադրին զինադադարի 60 օրուան աւարտին: Ֆրանսայի նախագահը այցելեց նաեւ Պէյրութի Ժըմմէյզի թաղամաս, ուր տեսակցեցաւ քաղաքացիներուն հետ, ապա ծաղկեպսակ մը զետեղեց անյայտ զինուորի յուշակոթողին առջեւ:
