Նախանցեալ օր՝ 14 Յունուարին, Ուաշինկթընի մէջ տեղի ունեցաւ հայ-ամերիկեան ռազմավարական գործընկերութեան մասին կանոնադրութեան ստորագրումը, ձեռամբ արտաքին գործերու նախարարներ Արարատ Միրզոյեանի եւ Անթոնի Պլինքընի: Ստորագրուած կանոնադրութեան մէջ նշուած է, թէ երկու երկիրները կը նպատակադրեն խորացնել իրենց գործընկերութիւնը՝ ի շահ հայ եւ ամերիկացի ժողովուրդներուն, նաեւ կը միտին ընդլայնել համագործակցութիւնը փոխադարձ առաջնահերթութիւններու լայն շրջանակի մէջ: «Երեւանն ու Ուաշինկթընը կ’ընդգծեն, որ երկու ժողովրդավարական երկիրներուն միջեւ այս համագործակցութիւնը հիմնուած է ընդհանուր արժէքներուն եւ համատեղ շահերուն վրայ: Անոնք կը ներառեն ժողովրդավարութեան եւ տարածքային ամբողջականութեան պաշտպանութիւնը, օրէնքի գերակայութիւնն ու մարդկային իրաւունքներու ամրապնդումը, նորարարական եւ արհեստագիտութեան զարգացումը, ինչպէս նաեւ ուժանիւթային անվտանգութեան ամրապնդումը», նշուած է Միրզոյեանի եւ Պլինքընի ստորագրած համաձայնութեան կանոնադրութեան մէջ:
