Կազայի մէջ աւելի քան 15 ամիս շարունակուող պատերազմը կ’ուղղուի դէպի դադրեցում: Քաթարի միջնորդութեամբ եւ ամերիկեան ճնշումներով շարունակուած բանակցութիւնները վերջապէս արդիւնաւորուեցան համաձայնութեամբ, որ կը ներառէ շարք մը փուլեր՝ գերիներու փոխանակում, ռազմական գործողութիւններու առկախում եւ մարդասիրական օգնութիւններու անյապաղ փոխանցում կարիքաւորներուն: Միացեալ Նահանգներու արտաքին գործերու նախարար Անթոնի Պլինքըն յայտնեց, որ Կազայի հարցով համաձայնութիւնը մօտալուտ է: Համաս շարժումը երէկ իր կարգին յայտարարեց, թէ քաթարցի ու եգիպտացի միջնորդներուն փոխանցած է զինադադարի առաջարկուած գործարքին իր համաձայնութիւնը: Կը սպասուի, որ Համասի բանագնաց Խալիլ Հայյէ այսօր պաշտօնապէս յայտարարէ համաձայնութեան մանրամասնութիւնները, սակայն գործադրութիւնը հաւանաբար կատարուի Կիրակի օր:
Իսրայէլի կառավարութիւնը միւս կողմէ յայտարարեց, թէ Կազայի շուրջ համաձայնութեամբ իրականացուցած կ’ըլլան պատերազմին նպատակները, իսկ եթէ ձախողին բանակցային մնացեալ փուլերը, ապա պատերազմը պիտի վերսկսի:
