Խորհրդարանին մէջ երէկ սկսան նոր կառավարութեան կազմութեան հարցով նշանակեալ վարչապետ Նաուաֆ Սալամին հետ երեսփոխանական խմբակցութիւններուն ոչ-պարտադիր խորհրդակցութիւնները, որոնք սկսան յատկանշական զարգացումով՝ խորհրդարանի նախագահ Նեպիհ Պըրրիի բացակայութեամբ, որ մեկնաբանուեցաւ որպէս վարչապետի նշանակումին ընկերակցած զարգացումներով պայմանաւորուած դժգոհութեան արտայայտութիւն: Պըրրի լրագրողներուն հետ ցրոյցին ընթացքին մերժեց մեկնաբանել խորհրդակցութիւնը պոյքոթի ենթարկելու մասին հարցումները, սակայն նշեց, որ Սալամի հետ պիտի տեսակցի Ուրբաթ օր: Խորհրդարանի նախագահը յայտնեց նաեւ, թէ Ֆրանսայի նախագահին հետ սպասուած հաղորդակցութիւնն ալ չէ կայացած:
Պըրրիի պոյքոթով հանդերձ, խորհրդարանին մէջ երէկ տեղի ունեցան աշխոյժ խորհրդակցութիւններ: Երեսփոխանական խմբակցութիւններն ու անկախ երեսփոխանները հերթաբար ժամանեցին Նըժմէ հրապարակ եւ նշանակեալ վարչապետին ներկայացուցին կազմուելիք կառավարութեան վերաբերեալ իրենց պատկերացումներն ու պահանջները: Ընդհանուր առմամբ, երեսփոխանները համաձայնեցան կառավարութիւնը անյապաղ կազմելու եւ գործունեայ բոլոր ուժերը ընդգրկելու հարցերուն առնչութեամբ: Խմբակցութիւնները կոչ ուղղեցին զերծ մնալու տարակարծութիւններէն եւ լարուածութենէն, այլ համագործակցութեան ոգիով շարունակելու նախագահի ընտրութեամբ եւ վարչապետի նշանակումով յառաջացած դրականութիւնը: Լիբանանեան ուժեր կուսակցութեան պատուիրակութիւնը մաղթեց, որ վարչապետի նշանակումի հոլովոյթէն դժգոհ Հըզպալլան ու Ամալը եւս մաս կազմեն նոր կառավարութեան, սակայն յիշեցուց, թէ անոնք շիի յարանուանութեան միակ ներկայացուցիչները չեն: Իսկ երեսփոխան Ժըպրան Պասիլ Ազգային ազատ հոսանքին անունով յայտնեց, թէ իրենք որեւէ պահանջ չեն ներկայացուցած Սալամին, սակայն կը մաղթեն, որ քաղաքական ուժերը նոր կառավարութեան մէջ ներկայացուած ըլլան մասնագէտներու միջոցաւ: «Ժողովրդավարական հանդիպում» խմբակցութեան նախագահ Թէյմուր Ճոմպլաթ մաղթեց, որ քաղաքական ուժերը մեղմեն ճնշումը եւ շատ պահանջներ չներկայացնեն Սալամին, որպէզի ան յաջողի շուտով կազմել նոր կառավարութիւնը: «Փոփոխութեան դաշինք» համախմբումի անդամ Մարք Տաու պահանջեց հնարաւորինս սեղմ կառավարութիւն կազմել եւ խուսափիլ քաղաքական բաժնեկցութեան տրամաբանութենէն:
