Հանրապետութեան նախագահ Ժոզէֆ Աուն շեշտեց նոր կառավարութիւնը անյապաղ կազմելու կարեւորութիւնը, որպէսզի վերականգնուի Լիբանանին նպատմամբ միջազգային վստահութիւնը: Ըստ Աունի, պատասխանատու պաշտօններ վարող անձնաւորութիւնները պէտք է յանձնառու ըլլան իրենց պարտականութիւններու ամբողջական կատարումին: Պատրիարքներու պատուիրակութիւն մը ընդունած ատեն նախագահը շեշտեց, որ իր նպատակն է կառուցել գործունեայ պետութիւն մը եւ ապահովել լիբնանանցիներու արտերկրէն տունդարձը, փակել անցեալի էջը եւ լաւատեսութեամբ նայիլ ապագային: «Որեւէ յարանուանութիւն չունի նախապատուութիւն, այլ բոլորը հաւասար են Լիբանանի դրօշին տակ», ըսաւ նախագահը, խոստանալով պահպանել դատական համակարգին անկախութինը եւ ապահովական կայունութիւնը: «Մենք այստեղ ենք ոչ թէ նկարուելու, այլ՝ աշխատելու, իսկ երդմնակալութեան ուղերձը պարզապէս գրութիւն չէ, այլ ուղեցոյց մը դէպի խաղաղ, անվտանգ եւ արժանապատիւ կեանք», հաստատեց Աուն:
