Հարաւի սահմանային գօտիի արեւմտեան հատուածին մէջ, լիբանանեան բանակը առաւօտեան ժամերէն սկսեալ շարունակեց իր տեղակայումը այն շրջաններուն մէջ, ուրկէ վերջերս քաշուած են իսրայէլեան ուժերը: Բանակի տեղակայումը ներառեց Այթարունի արեւմտեան հատուածը՝ շուտով նշեալ բնակավայրը մուտք գործելու եւ ճամբաները վերաբանալու նպատակով: Նշենք, որ իսրայէլեան ուժերը զինադադարէն ետք մուտք գործած էին Այթարուն եւ հողակոյտերով փակած էին անոր ճամբաները՝ կանխելու համար քաղաքացիներուն վերադարձը: Լիբանանցի զինուորները սահմանամերձ Շամաայի մէջ պայթեցուցին նաեւ այդ շրջանին մէջ յայտնաբերուած 107 միլիմեթրանոց 31 հրթիռ:
Երէկ հարաւարեւմտեան գօտի այցելեցին նաեւ զինադադարը դիտարկող յանձնախումբի նախագահ, ամերիկացի զօրավար Ճասփըր Ճեֆըրզը, ընկերակցութեամբ ֆրանսացի ներկայացուցիչին եւ ԵՈՒՆԻՖԻԼ-ի: Պատուիրակութիւնը այցելեց արեւմտեան հատուածին մէջ տեղակայուած լիբանանեան բանակին եւ ծանօթացաւ անոր աշխատանքին: Ամերիկացի զօրավարը դրուատեց լիբանանեան բանակին գործողութիւնները, որպէս Լիբանանի անվտանգութեան օրինական միակ պահապանները: Ան շեշտեց, որ բանակը կը կատարէ իր պարտականութիւնները եւ կը վերականգնէ հարաւային գիւղերուն անվտանգութիւնը, որպէսզի քաղաքացիները կարենան վերադառնալ իրենց տուները:
