Ամերիկեան իշխանութիւնները յայտարարեցին, թէ Լոս Անճելըսի շրջանին մէջ շաբաթ մը առաջ բռնկած հրդեհներու զոհերուն թիւը բարձրացած է առնուազն 24-ի, քանի մը տասնեակ քաղաքացիներ կը մնան անհետ կորսուած, իսկ իշխանութիւնները կը յայտարարեն, թէ տակաւին կանուխ է խօսիլ աղէտի վերջնական հետեւանքներուն մասին: Տեղական իշխանութիւնները երէկ յայտարարեցին հրդեհներուն դէմ ճակատամարտին մէջ որոշ յառաջընթացի մասին, սակայն զգուշացուցին, թէ այսօր կանխատեսուած սաստիկ քամին կրնայ դարձեալ ընդարձակել բոցերը ու վերստին դժուարացնել պայքարը: Հրշէջներու պատասխանատուներէն մէկը երէկ յայտնեց, թէ տասնեակ հազարաւոր քաղաքացիներ տակաւին կը գտնուին վտանգուած շրջաններու մէջ եւ գուցէ կրնան ստանալ տարհանումի հրահանգ: Նշենք, որ Գալիֆորիոյ մէջ բռնկած հրդեհներէն երկուքը կը համարուին նահանգի պատմութեան երկրորդ եւ 4-րդ մեծագոյնները:
