Ռիատի մէջ երէկ գումարուեցաւ Սուրիոյ հարցի քննարկումին նուիրուած արաբ եւ օտարերկրացի արտաքին գործերու նախարարներու համաժողով մը, որուն մասնակիցները մտահոգութիւն յայտնեց իսրայէլեան ներթափանցումներէն, առաջարկելով մարտահրաւէրները լուծել երկխօսութեամբ, զերծ մնալով բռնութենէ: Սէուտական Արաբիոյ արտաքին գործերու նախարար Ֆայսալ պըն Ֆարհան կոչ ուղղեց չեղարկելու Սուրիոյ նկատմամբ սահմանուած պատժամիջոցները՝ հնարաւորութիւն տալով պետական հաստատութիւններու վերականգնումին: Սէուտցի նախարարը ահազանգեց, թէ միջազգային եւ միակողմանի պատժամիջոցները պիտի խոչընդոտեն սուրիացիներուն բարգաւաճումի եւ վերականգնումի ձգտող միտումները, ուստի անհրաժեշտ է վերջ տալ պատժամիջոցներուն: Եւրոմիութեան արտաքին գործերու նախարար Քայա Քալաս իր կարգին յայտնեց, թէ Եւրոմիութիւնը պիտի սկսի չեղարկել պատժամիջոցները, եթէ Դամասկոսի նոր իշխանութիւնները վճռորոշ քայլեր առնեն փոքրամասնութիւնները պաշտպանող կառավարութիւն կազմելու ուղղութեամբ: «Եթէ տեսնենք, որ Սուրիոյ իշխանութիւնները կը շարժին ճիշդ ուղղութեամբ, պատրաստ պիտի ըլլանք դիմելու դրական քայլերու», ըսաւ եւրոպացի ներկայացուցիչը:
Այլ գիծի վրայ, Սուրիոյ անցումային կառավարութեան Ներքին գործերու նախարարութիւնը պաշտօնապէս յայտարարեց, թէ վերսկսած է հրապարակել սուրիական անցնագրեր:
