Լիբանանի Հանրապետութեան նոր նախագահի ընտրութենէն եւ վարչապետի նշանակումէն ետք, յառաջիկայ օրերուն կազմուելիք նոր կառավարութեան առաջին մարտահրաւէրը պիտի ըլլայ հարաւի մէջ կայունութեան վերականգնումը եւ իսրայէլեան տակաւին շարունակուող խախտումներուն զսպումը: Իսրայէլեան ուժերը երէկ յաւելեալ բնակարաններ պայթեցուցին Այթա Շաապի մէջ, իսկ ռազմական օդանաւեր հարուածեցին նաեւ Պաալպաք գաւառի Ժանթա շրջանն ու Սուրիոյ հետ սահմանային լեռնաշղթան՝ ներառեալ Հըրմէլի Քասր շրջանի սահմանային անցակէտ մը: Իսրայէլեան բանակը յայտարարեց, թէ, հիմնուելով հետախուզական տուեալներու վրայ, թիրախաւորած է Հըզպալլայի դիրքերը եւ շարժումները: Քաղաքացիական անվտանգութիւնը յայտարարեց, թէ 10 զոհի աճիւն յայտնաբերած է Թէյրհարֆայի մէջ եւ զոհի մը մարմին՝ Շամաայի մէջ:
